హైదరాబాద్‌లో రేడియో టవర్ ఎక్కి కడప యువకుడు హల్‌చల్

ప్రియురాలు పెళ్లికి అంగీకరించలేదని ఒక యువకుడు హైదరాబాద్‌లోని ఎల్బీనగర్, చింతలకుంట ప్రాంతంలో రేడియో టవర్ ఎక్కి హల్‌చల్ చేశాడు. తాను ప్రేమించిన అమ్మాయి పెళ్లికి అంగీకరించడం లేదని, ఆమె లేకపోతే ఆత్మహత్య చేసుకుంటానని బెదిరించాడు. పోలీసులు, అగ్నిమాపక సిబ్బంది సంఘటన స్థలానికి చేరుకున్నారు. యువకుడిని రేడియో టవర్ మీది నుంచి కిందకు దించేందుకు పోలీసులు ప్రయత్నాలు చేస్తున్నారు.

జానీ అనే యువకుడు అక్కడి ప్రసార భారతి రేడియో టవర్ ఎక్కి డయల్ 100కు ఫోన్ చేశాడు. తనను ముఖ్యమంత్రితో మాట్లాడించాలని డిమాండ్ చేశాడు. ఆత్మహత్య చేసుకుంటానని బెదిరిస్తూ, పలు కారణాలు చెబుతున్నాడు. ఆటో గ్యాస్ కోసం ఇబ్బంది అవుతోందని, నిరుద్యోగం, ప్రియురాలు పెళ్లికి ఒప్పుకోలేదంటూ వివిధ కారణాలు చెప్పాడు. ఎట్టకేలకు పోలీసులు, అగ్నిమాపక సిబ్బంది అతనిని సురక్షితంగా కిందకు దించారు. జానీ ఆంధ్రప్రదేశ్‌లోని కడప జిల్లా తుమ్మలపల్లి గ్రామానికి చెందినవాడు.