ఇన్‌స్టా ప్రేమ... ప్రియుడి కోసం దొంగగా మారిన యువతి... పోలీసుల విచారణలో విస్తుపోయే నిజాలు

సోషల్ మీడియా మోజులో పడి యువతరం దారితప్పుతోంది. వాస్తవ ప్రపంచానికి, వర్చువల్ ప్రపంచానికి మధ్య తేడాను గుర్తించలేక జీవితాలను నాశనం చేసుకుంటోంది. ముఖపరిచయం లేని వ్యక్తులను గుడ్డిగా నమ్మి, కన్నవారిని సైతం మోసం చేసేందుకు వెనుకాడటం లేదు. తాజాగా రాజన్న సిరిసిల్ల జిల్లాలో జరిగిన ఓ సంఘటన ఇందుకు అద్దం పడుతోంది. ఇన్‌స్టాగ్రామ్‌లో పరిచయమైన ప్రియుడి కోసం ఓ యువతి ఏకంగా కన్నతల్లి దాచుకున్న బంగారాన్నే దొంగిలించి, ఖరీదైన బైక్‌ను బహుమతిగా ఇచ్చింది.

వివరాల్లోకి వెళితే... గంభీరావుపేట మండలానికి చెందిన ఓ యువతికి, ఎల్లారెడ్డిపేట మండలం రాచర్ల గొల్లపల్లి గ్రామానికి చెందిన ఓ యువకుడితో ఇన్‌స్టాగ్రామ్ ద్వారా పరిచయం ఏర్పడింది. కొద్దిరోజులకే ఈ పరిచయం ప్రేమగా మారింది. అయితే, ఆ యువకుడు ఆమె అమాయకత్వాన్ని ఆసరాగా చేసుకొని లబ్ధి పొందాలని చూశాడు. తనకు ఓ ఖరీదైన స్పోర్ట్స్ బైక్ కొనిస్తేనే ప్రేమను కొనసాగిస్తానని, లేకపోతే సంబంధం ఉండదని షరతు పెట్టాడు. ప్రియుడి మాటలకు లొంగిపోయిన ఆ యువతి, అతని కోరిక తీర్చేందుకు సిద్ధపడింది.

అయితే, తన వద్ద అంత డబ్బు లేకపోవడంతో అడ్డదారి తొక్కింది. ఇంట్లో తల్లి భద్రంగా దాచుకున్న బంగారు ఆభరణాలను ఎవరికీ తెలియకుండా దొంగిలించింది. వాటిని విక్రయించగా వచ్చిన డబ్బుతో ప్రియుడు అడిగిన విలాసవంతమైన బైక్‌ను కొనుగోలు చేసి బహుమతిగా ఇచ్చింది. కొన్ని రోజుల తర్వాత ఇంట్లో బంగారం కనిపించకపోవడంతో తల్లి ఆందోళన చెందింది. ఇంట్లో ఎంత వెతికినా ఆభరణాలు దొరకకపోవడంతో అనుమానంతో ఎల్లారెడ్డిపేట పోలీసులకు ఫిర్యాదు చేసింది.

తల్లి ఫిర్యాదు మేరకు కేసు నమోదు చేసుకున్న పోలీసులు విచారణ ప్రారంభించారు. కుటుంబ సభ్యులను విచారించే క్రమంలో కూతురి ప్రవర్తనపై వారికి అనుమానం కలిగింది. దీంతో ఆమెను తమదైన శైలిలో ప్రశ్నించగా, అసలు విషయం బయటపెట్టింది. ఇన్‌స్టా ప్రియుడి కోరిక తీర్చడం కోసం తానే తల్లి బంగారాన్ని దొంగిలించి, బైక్ కొనిచ్చినట్లు అంగీకరించింది. కన్నకూతురే ఈ పని చేసిందని తెలిసి ఆ తల్లి షాక్‌కు గురైంది. ఈ ఘటనపై స్పందించిన పోలీసులు, సోషల్ మీడియాలో అపరిచితులతో స్నేహం చేసేటప్పుడు యువత అప్రమత్తంగా ఉండాలని సూచించారు. గుడ్డిగా నమ్మి ఇలాంటి తప్పుడు నిర్ణయాలు తీసుకోవడం వల్ల కుటుంబాలు వీధినపడే ప్రమాదం ఉందని హెచ్చరించారు.