ఒకే క్యాచ్.. మ్యాచ్ టర్న్.. సెమీస్‌లో భారత్‌ను గెలిపించిన అక్షర్ పటేల్!

టీ20 ప్రపంచకప్ 2026 సెమీఫైనల్‌లో ఇంగ్లండ్‌పై భారత్ 7 పరుగుల తేడాతో సాధించిన ఉత్కంఠ విజయంలో ఆల్‌రౌండర్ అక్షర్ పటేల్ తెరవెనుక హీరోగా నిలిచాడు. బ్యాటింగ్, బౌలింగ్‌లోనే కాకుండా తన అసాధారణ ఫీల్డింగ్‌తో మ్యాచ్ గతిని మార్చేశాడు. ముఖ్యంగా శివమ్ దూబేతో కలిసి అతను పట్టిన ఒక స్టన్నింగ్ రిలే క్యాచ్, మ్యాచ్‌ను పూర్తిగా భారత్ వైపు తిప్పేసింది.

ఈ మ్యాచ్‌లో ఇంగ్లండ్ బ్యాటింగ్ చేస్తున్న సమయంలో విల్ జాక్స్, జాకబ్ బెథెల్ జోడీ ప్రమాదకరంగా మారింది. కేవలం 39 బంతుల్లో 77 పరుగుల భాగస్వామ్యం నెలకొల్పి, భారత శిబిరంలో ఆందోళన రేపారు. ఈ దశలో అర్ష్‌దీప్ సింగ్ వేసిన 14వ ఓవర్ చివరి బంతిని విల్ జాక్స్ బలంగా బాదాడు. బంతి సిక్సర్‌గా వెళ్తుందని అందరూ భావించారు.

అయితే, డీప్ ఎక్స్‌ట్రా కవర్ నుంచి వేగంగా పరుగెత్తుకొచ్చిన అక్షర్ పటేల్, బౌండరీ లైన్‌కు అత్యంత సమీపంలో బంతిని అందుకున్నాడు. కానీ, తన శరీరం బ్యాలెన్స్ కోల్పోయి బౌండరీ లైన్ దాటబోతున్నానని గ్రహించి, అద్భుతమైన సంయమనంతో బంతిని తిరిగి మైదానంలోకి విసిరాడు. సమీపంలోనే ఉన్న శివమ్ దూబే టక్కున ఆ బంతిని సురక్షితంగా అందుకోవడంతో విల్ జాక్స్ (20 బంతుల్లో 35) ఇన్నింగ్స్‌కు తెరపడింది. ఈ అద్భుతమైన క్యాచ్ పూర్తయిన వెంటనే భారత హెడ్ కోచ్ గౌతమ్ గంభీర్ ఆనందంతో ఉప్పొంగిపోయారు. ఈ క్యాచ్‌తో ఇంగ్లండ్ మంచి భాగస్వామ్యం విడిపోయింది.

ఈ క్యాచ్ మాత్రమే కాకుండా మ్యాచ్‌లో అక్షర్ మరో రెండు క్యాచ్‌లు కూడా అందుకున్నాడు. ముఖ్యంగా ఇంగ్లండ్ కెప్టెన్ హ్యారీ బ్రూక్‌ను ఔట్ చేయడానికి వెనక్కి డైవ్ చేస్తూ పట్టిన క్యాచ్ మరో హైలైట్‌గా నిలిచింది. ఇన్నింగ్స్ రెండో ఓవర్లో మరో సులువైన క్యాచ్ కూడా తీసుకున్నాడు. బౌలింగ్‌లోనూ రాణించిన టీమిండియా వైస్ కెప్టెన్ అక్షర్ పటేల్, టామ్ బాంటన్ వికెట్‌ను పడగొట్టాడు. తన ఆల్‌రౌండ్ ప్రదర్శనతో కీలకమైన సెమీఫైనల్ మ్యాచ్‌లో భారత్ విజయంలో అక్షర్ పటేల్ తనదైన ముద్ర వేశాడు.