తెలంగాణ టెన్త్ హాల్ టికెట్ల విడుదల.. మెసేజ్‌తోనూ డౌన్‌లోడ్

తెలంగాణలో పదో తరగతి పబ్లిక్ పరీక్షలకు సిద్ధమవుతున్న విద్యార్థులకు ముఖ్య గమనిక. విద్యాశాఖ గురువారం ఎస్సెస్సీ పరీక్షల హాల్ టికెట్లను విడుదల చేసింది. విద్యార్థులు అధికారిక వెబ్‌సైట్ bse.telangana.gov.in నుంచి తమ హాల్ టికెట్లను డౌన్‌లోడ్ చేసుకోవచ్చు.

ఈసారి విద్యార్థుల సౌలభ్యం కోసం బోర్డు సరికొత్త విధానాన్ని అందుబాటులోకి తెచ్చింది. 8096958096 నంబర్‌కు మెసేజ్ పంపడం ద్వారా కూడా హాల్ టికెట్‌ను పొందే సదుపాయం కల్పించింది. ముందుగా ప్రకటించిన షెడ్యూల్ ప్రకారం మార్చి 14వ తేదీ నుంచి పదో తరగతి పరీక్షలు ప్రారంభం కానున్నాయి. ప్రతిరోజూ ఉదయం 9:30 గంటల నుంచి మధ్యాహ్నం 12:45 గంటల వరకు పరీక్షలు నిర్వహిస్తారు.

హాల్ టికెట్ల డౌన్‌లోడ్‌లో ఏవైనా సాంకేతిక సమస్యలు ఎదురైతే, విద్యార్థులు లేదా తల్లిదండ్రులు 040-23230942 నంబర్‌లో సంప్రదించి సహాయం పొందవచ్చని అధికారులు సూచించారు.