అమరావతి ఐఆర్‌ఆర్‌ కేసులో కొత్త మలుపు.. హైకోర్టులో మాజీ ఎమ్మెల్యే పిటిషన్

గత ప్రభుత్వ హయాంలో అప్పటి ప్రతిపక్ష నేత చంద్రబాబుతో పాటు మరికొందరిపై నమోదైన అమరావతి ఇన్నర్‌ రింగ్‌ రోడ్డు (ఐఆర్‌ఆర్‌) కేసు విచారణ మరో మలుపు తిరిగింది. ఈ కేసును విజయవాడ ఏసీబీ కోర్టు నుంచి ప్రజాప్రతినిధుల (ఎంపీ, ఎమ్మెల్యే) ప్రత్యేక కోర్టుకు బదిలీ చేయాలని కోరుతూ వైసీపీ మాజీ ఎమ్మెల్యే ఆళ్ల రామకృష్ణారెడ్డి ఏపీ హైకోర్టును ఆశ్రయించారు. ఈ మేరకు ఆయన హైకోర్టులో పిటిషన్ దాఖలు చేశారు.

ప్రజాప్రతినిధులపై నమోదైన కేసులను కేవలం ప్రత్యేక కోర్టులు మాత్రమే విచారించాలని సుప్రీంకోర్టు తీర్పు ఉందని ఆళ్ల రామకృష్ణారెడ్డి తన పిటిషన్‌లో ప్రస్తావించారు. ఐఆర్‌ఆర్‌ కేసులో ప్రస్తుత ముఖ్యమంత్రి, ఒక మంత్రి, మాజీ ఎమ్మెల్యేలు నిందితులుగా ఉన్నారని, అందువల్ల ఈ కేసు విచారణ ప్రత్యేక కోర్టు పరిధిలోకి వస్తుందని ఆయన వాదించారు. ఈ నేపథ్యంలో విజయవాడ ఏసీబీ కోర్టులో జరుగుతున్న విచారణను నిలిపివేయాలని, కేసు తుది నివేదికను అంగీకరించకుండా స్టే ఇవ్వాలని హైకోర్టును అభ్యర్థించారు.

ఇదే అంశంపై ఆళ్ల రామకృష్ణారెడ్డి హైకోర్టులో మరో పిటిషన్ కూడా దాఖలు చేశారు. ఐఆర్‌ఆర్‌ కేసుకు సంబంధించి సీఐడీ నమోదు చేసిన ఛార్జ్‌షీట్‌, తుది నివేదికలను తనకు అందజేసేలా ఆదేశాలు ఇవ్వాలని కోరారు. ఆ పత్రాలు తనకు అందకపోవడం వల్లే విజయవాడ ఏసీబీ కోర్టులో ప్రొటెస్ట్‌ పిటిషన్‌ దాఖలు చేయలేకపోయానని ఆయన తన పిటిషన్‌లో పేర్కొన్నారు.

గత నెలలో ఈ కేసుపై ఏసీబీ కోర్టులో విచారణ జరిగింది. 2024లో సీఐడీ దాఖలు చేసిన ఛార్జ్‌షీట్‌ వివరాలు, 2026లో కేసు ఉపసంహరణ కోసం వేసిన పిటిషన్‌ కాపీలను తమకు ఇవ్వలేదని ఫిర్యాదిదారు అయిన ఆళ్ల తరఫు న్యాయవాది కోర్టు దృష్టికి తీసుకెళ్లారు. అభ్యంతరాలు తెలిపేందుకు గడువు కావాలని కోరగా, న్యాయస్థానం అంగీకరించి తదుపరి విచారణను మార్చి 11వ తేదీకి వాయిదా వేసింది. ఇప్పుడు హైకోర్టులో పిటిషన్లు దాఖలు కావడంతో ఈ కేసు విచారణ మరింత ఆసక్తికరంగా మారింది.