టీ20 ప్రపంచకప్ సెమీస్... టీమిండియాపై టాస్ గెలిచిన ఇంగ్లండ్

ఐసీసీ మెన్స్ టీ20 వరల్డ్ కప్ 2026లో భాగంగా ముంబైలోని వాంఖడే స్టేడియంలో భారత్, ఇంగ్లండ్ జట్ల మధ్య రెండో సెమీఫైనల్ మ్యాచ్ జరగనుంది. ఈ కీలక పోరులో టాస్ గెలిచిన ఇంగ్లండ్ కెప్టెన్ హ్యారీ బ్రూక్ బౌలింగ్ ఎంచుకున్నాడు. దీంతో టీమిండియా మొదట బ్యాటింగ్ చేయనుంది.

టాస్ సందర్భంగా భారత కెప్టెన్ సూర్యకుమార్ యాదవ్ మాట్లాడుతూ.. తాము కూడా టాస్ గెలిస్తే బ్యాటింగే ఎంచుకునేవారమని, ముందుగా బ్యాటింగ్ చేయడం తమకు సంతోషమేనని తెలిపాడు. ఇది సెమీఫైనల్ అని, పెద్ద మ్యాచ్ అని పేర్కొన్నాడు. వాంఖడే పిచ్ బ్యాటింగ్‌కు అద్భుతంగా ఉందని... గ్రౌండ్ సిబ్బంది, క్యూరేటర్లు పిచ్‌ను బాగా తీర్చిదిద్దారని ప్రశంసించాడు. ఈ రోజు మంచు ప్రభావం పెద్దగా ఉండకపోవచ్చని, గాలి కూడా వీస్తోందని సూర్య విశ్లేషించాడు. గత మ్యాచ్‌లో ఆడిన జట్టుతోనే బరిలోకి దిగుతున్నట్లు సూర్య స్పష్టం చేశాడు.

మరోవైపు ఇంగ్లండ్ కెప్టెన్ హ్యారీ బ్రూక్ మాట్లాడుతూ.. వికెట్ బ్యాటింగ్‌కు అనుకూలంగా కనిపిస్తోందని, ఆరంభంలోనే వికెట్లు తీసి, ఆ తర్వాత లక్ష్యాన్ని ఛేదించడమే తమ ప్రణాళిక అని వెల్లడించాడు. వాంఖడే మైదానంలో భారత్‌కు ఎక్కువ అనుభవం ఉన్నప్పటికీ.. పరిస్థితులను త్వరగా అర్థం చేసుకుని మెరుగైన ప్రదర్శన చేస్తామని ధీమా వ్యక్తం చేశాడు. స్టేడియం నిండా భారత అభిమానులు ఉన్నారని, తమ ఆటతో వారిని సెలైంట్ గా ఉంచేందుకు ప్రయత్నిస్తామని బ్రూక్ వ్యాఖ్యానించాడు. ఇంగ్లండ్ జట్టులో ఒక మార్పు చోటుచేసుకుంది. రెహాన్ అహ్మద్ స్థానంలో జేమీ ఓవర్టన్ జట్టులోకి వచ్చాడు.

తుది జట్లు:

భారత్: అభిషేక్ శర్మ, సంజూ శాంసన్ (వికెట్ కీపర్), ఇషాన్ కిషన్, సూర్యకుమార్ యాదవ్ (కెప్టెన్), తిలక్ వర్మ, హార్దిక్ పాండ్యా, శివమ్ దూబే, అక్షర్ పటేల్, అర్ష్‌దీప్ సింగ్, వరుణ్ చక్రవర్తి, జస్‌ప్రీత్ బుమ్రా.

ఇంగ్లండ్: ఫిల్ సాల్ట్, జోస్ బట్లర్ (వికెట్ కీపర్), హ్యారీ బ్రూక్ (కెప్టెన్), జాకబ్ బెథెల్, టామ్ బాంటన్, సామ్ కరన్, విల్ జాక్స్, జేమీ ఓవర్టన్, లియామ్ డాసన్, జోఫ్రా ఆర్చర్, ఆదిల్ రషీద్.