ఏపీలో నేటి నుంచి పదో తరగతి హాల్ టికెట్ల జారీ

ఆంధ్రప్రదేశ్ రాష్ట్రంలో పదో తరగతి విద్యార్థులకు కీలక అలర్ట్. రాష్ట్రంలో మార్చి 16 నుంచి జరగనున్న టెన్త్ పబ్లిక్ పరీక్షలకు సంబంధించి నేడు (మార్చి 5) ఉదయం 11 గంటలకు హాల్ టికెట్లు విడుదల చేశారు. ఈ మేరకు ప్రభుత్వ పరీక్షల విభాగం సంచాలకులు కె.వి. శ్రీనివాసులురెడ్డి తెలిపారు. పరీక్షలకు సన్నద్ధమవుతున్న విద్యార్థులు నేటి నుంచి తమ హాల్ టికెట్లను ఆన్‌లైన్ ద్వారా పొందవచ్చు.

విద్యార్థులు తమ హాల్ టికెట్లను బోర్డ్ ఆఫ్ సెకండరీ ఎడ్యుకేషన్ అధికారిక వెబ్‌సైట్ ద్వారా డౌన్‌లోడ్ చేసుకోవచ్చు. సాంకేతికతను మరింత అందుబాటులోకి తెస్తూ.. ఈసారి 'మన మిత్ర' వాట్సాప్ నంబర్ 95523 00009 కు మెసేజ్ చేయడం ద్వారా లేదా పాఠశాల విద్యాశాఖకు చెందిన 'లీప్' (LEAP) యాప్ ద్వారా కూడా సులభంగా హాల్ టికెట్లు పొందే వెసులుబాటు కల్పించారు. వెబ్‌సైట్‌లో జిల్లా, పాఠశాల పేరు, విద్యార్థి పేరు, పుట్టిన తేదీ వివరాలను ఎంటర్ చేసి హాల్ టికెట్ ప్రింట్ తీసుకోవాల్సి ఉంటుంది.

హాల్ టికెట్ల జారీకి సంబంధించి బోర్డు ఎటువంటి ప్రైవేటు ఏజెన్సీలకు గానీ, థర్డ్ పార్టీ వెబ్‌సైట్లకు గానీ అనుమతి ఇవ్వలేదని అధికారులు స్పష్టం చేశారు. కేవలం అధికారిక మార్గాలను మాత్రమే ఎంచుకోవాలని, అనధికారిక లింకులను నమ్మవద్దని సూచించారు. హాల్ టికెట్లలో ఏవైనా తప్పులు ఉన్నా, సందేహాలు ఉన్నా వెంటనే సంబంధిత పాఠశాల ప్రధానోపాధ్యాయులను సంప్రదించాలని విద్యార్థులకు, తల్లిదండ్రులకు అధికారులు సూచించారు. మార్చి 16 నుంచి పరీక్షలు మొదలుకానున్న నేపథ్యంలో విద్యార్థులు ముందుగానే హాల్ టికెట్లు తీసుకుని సిద్ధంగా ఉండాలని కోరారు.