నిద్రమాత్రలిచ్చి.. ప్రియుడితో కుమార్తెపై అత్యాచారం చేయించిన తల్లి

సభ్య సమాజం తలదించుకునే దారుణ ఘటన చెన్నైలో వెలుగులోకి వచ్చింది. తన అక్రమ సంబంధానికి అడ్డు వస్తోందన్న కోపంతో, ఓ తల్లి కన్నకూతురిపైనే ప్రియుడితో అత్యాచారం చేయించింది. చెన్నైలోని సాలిగ్రామం ప్రాంతంలో జరిగిన ఈ అమానుష ఘటన ఆలస్యంగా బయటపడింది.

స్థానిక వాచ్‌మెన్‌ భార్య అయిన మహిళ, తన ప్రియుడు దక్షిణామూర్తి (50)తో కలిసి ఈ ఘాతుకానికి పాల్పడింది. భర్త విధుల్లో ఉన్నప్పుడు ప్రియుడిని ఇంటికి పిలిపించుకునేది. ఈ విషయాన్ని గమనించి 20 ఏళ్ల కుమార్తె తల్లిని నిలదీయడంతో, ఆమెపై కక్ష పెంచుకుంది. గత నెల 3వ తేదీన అనారోగ్యంతో ఉన్న కుమార్తెకు నిద్రమాత్రలు ఇచ్చి, ఆమె మత్తులోకి జారుకున్నాక ప్రియుడితో అఘాయిత్యం చేయించింది.

అంతటితో ఆగకుండా, అదే నెల 23న కూడా నిందితురాలు మళ్లీ అదే ప్రయత్నం చేయగా, యువతి స్పృహలోకి వచ్చి కేకలు వేయడంతో విషయం బయటపడింది. తల్లి నుంచి తప్పించుకుని తిరువణ్ణామలైలోని బంధువుల ఇంటికి చేరుకున్న బాధితురాలు, తీవ్రమైన కడుపునొప్పితో బాధపడింది. ఆసుపత్రికి తరలించగా, ఆమె గర్భవతి అని వైద్యులు నిర్ధారించారు. దీంతో బాధితురాలు జరిగిన దారుణాన్ని బంధువులకు వివరించడంతో వారు పోలీసులను ఆశ్రయించారు.

బాధితురాలి బంధువుల ఫిర్యాదు మేరకు పోలీసులు కేసు నమోదు చేశారు. ఘటన జరిగిన ప్రాంతం ఆధారంగా కేసును వడపళని మహిళా పోలీస్ స్టేషన్‌కు బదిలీ చేశారు. ఆదివారం కేసు నమోదు చేసిన పోలీసులు, నిందితుడు దక్షిణామూర్తిని అదుపులోకి తీసుకున్నారు. ఈ కుట్రలో తల్లి పాత్రపై లోతుగా విచారణ జరుపుతున్నట్లు తెలిపారు. బాధితురాలికి మెరుగైన వైద్యం అందిస్తున్నారు.