టీ20 వరల్డ్ కప్‌లో ఆసీస్ బోణీ... ఐర్లాండ్‌పై ఘనవిజయం

టీ20 ప్రపంచకప్‌ 2026లో ఆస్ట్రేలియా శుభారంభం చేసింది. కొలంబో వేదికగా బుధవారం జరిగిన గ్రూప్-బి మ్యాచ్‌లో ఐర్లాండ్‌ను 67 పరుగుల భారీ తేడాతో చిత్తు చేసింది. బౌలర్లు ఆడమ్ జంపా, నాథన్ ఎల్లిస్ చెరో నాలుగు వికెట్లతో ఐర్లాండ్ పతనాన్ని శాసించగా, అంతకుముందు బ్యాటర్లు రాణించి భారీ స్కోరు అందించారు. లక్ష్యఛేదనలో ఐర్లాండ్ చేతులెత్తేసింది.

ఈ మ్యాచ్‌లో టాస్ గెలిచి ముందుగా బ్యాటింగ్ ఎంచుకున్న ఆస్ట్రేలియా నిర్ణీత 20 ఓవర్లలో 6 వికెట్ల నష్టానికి 182 పరుగులు చేసింది. ఓపెనర్ జోష్ ఇంగ్లిస్ (17 బంతుల్లో 37), మార్కస్ స్టోయినిస్ (29 బంతుల్లో 45), మాట్ రెన్‌షా (33 బంతుల్లో 37) కీలక ఇన్నింగ్స్‌లు ఆడారు. దీంతో ఆస్ట్రేలియా, ఐర్లాండ్‌ ముందు 183 పరుగుల భారీ లక్ష్యాన్ని నిర్దేశించింది. ఐర్లాండ్ బౌలర్లలో మార్క్ అడైర్ రెండు వికెట్లు తీశాడు.

183 పరుగుల లక్ష్య ఛేదనలో ఐర్లాండ్ ఏ దశలోనూ పోటీ ఇవ్వలేకపోయింది. ఆస్ట్రేలియా బౌలర్ల ధాటికి ఐరిష్ బ్యాటర్లు వరుసగా పెవిలియన్‌కు క్యూ కట్టారు. ఆ జట్టు 16.5 ఓవర్లలో 115 పరుగులకే ఆలౌట్ అయింది. జార్జ్ డాక్రెల్ (41) ఒక్కడే కాస్త పోరాటపటిమ చూపాడు. ఆస్ట్రేలియా బౌలర్లలో స్పిన్నర్ ఆడమ్ జంపా, పేసర్ నాథన్ ఎల్లిస్ చెరో 4 వికెట్లు తీసి ఐర్లాండ్ బ్యాటింగ్ ఆర్డర్‌ను కుప్పకూల్చారు. వీరిద్దరూ కలిసి కేవలం 35 పరుగులిచ్చి 8 వికెట్లు పంచుకుని ఆస్ట్రేలియాకు సునాయాస విజయాన్ని అందించారు.