దిగొచ్చిన అమెరికా.. బంగ్లాదేశ్‌పై భారీగా తగ్గిన సుంకాలు

అమెరికా, బంగ్లాదేశ్ మధ్య కీలక వాణిజ్య ఒప్పందం కుదిరింది. దీని ప్రకారం, బంగ్లాదేశ్ నుంచి వచ్చే ఎగుమతులపై అమెరికా విధించే సుంకాలను 19 శాతానికి తగ్గిస్తున్నట్టు ప్రకటించింది. వాషింగ్టన్ డీసీలో సోమవారం ఇరు దేశాల ప్రతినిధులు 'యునైటెడ్ స్టేట్స్-బంగ్లాదేశ్ రెసిప్రోకల్ ట్రేడ్ ఒప్పందం'పై సంతకాలు చేశారు. ఈ ఒప్పందం ఇరు దేశాల ఎగుమతిదారులకు అపూర్వమైన అవకాశాలు కల్పిస్తుందని వైట్ హౌస్ ఒక ప్రకటనలో పేర్కొంది.

ఈ ఒప్పందంలో మరో కీలకమైన అంశం కూడా ఉంది. అమెరికా నుంచి దిగుమతి చేసుకున్న కాటన్, ఇతర ఫైబర్‌తో బంగ్లాదేశ్‌లో తయారైన వస్త్రాలకు అమెరికా మార్కెట్‌లో సున్నా సుంకం (సుంకం లేని) ప్రవేశం కల్పించనున్నారు. ఇది బంగ్లాదేశ్ ఆర్థిక వ్యవస్థకు వెన్నెముకగా ఉన్న రెడీమేడ్ గార్మెంట్స్ రంగానికి పెద్ద ఊరటనిస్తుందని భావిస్తున్నారు. ఈ విషయాన్ని బంగ్లాదేశ్ తాత్కాలిక ప్రభుత్వ ప్రధాన సలహాదారు ముహమ్మద్ యూనస్ ధ్రువీకరించారు.

గత ఏడాది ఏప్రిల్‌లో ప్రారంభమైన చర్చల తర్వాత ఈ ఒప్పందం ఖరారైంది. మొదట బంగ్లాదేశ్ ఎగుమతులపై అమెరికా 37 శాతం వరకు సుంకాలు విధించాలని ప్రతిపాదించింది. సుదీర్ఘ చర్చల అనంతరం దీనిని మొదట 20 శాతానికి, ఇప్పుడు తాజాగా 19 శాతానికి తగ్గించారు. ఈ సుంకాల తగ్గింపునకు బదులుగా, బంగ్లాదేశ్ కూడా కొన్ని అమెరికా పారిశ్రామిక, వ్యవసాయ ఉత్పత్తులకు తమ మార్కెట్‌లో ప్రాధాన్యం ఇవ్వనుంది. ఈ ఒప్పందం అధికారికంగా అమల్లోకి రావాలంటే ఇరు దేశాలు నోటిఫికేషన్లు జారీ చేయాల్సి ఉంటుంది.