మన 'దుపట్టా'పై మనసు పారేసుకున్న అమెరికా మహిళ

 భారతీయ సంప్రదాయ వస్త్రధారణలో భాగమైన దుపట్టాను కనిపెట్టినందుకు భారతీయులకు ఓ అమెరికన్ మహిళ కృతజ్ఞతలు తెలిపింది. దుపట్టా వాడకం వల్ల తన దుస్తుల అందం పది రెట్లు పెరిగిందని ఆమె ప్రశంసించింది. ఇందుకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.

వివరాల్లోకి వెళితే, కెమి అనే కంటెంట్ క్రియేటర్ ఇన్‌స్టాగ్రామ్‌లో ఓ వీడియో పోస్ట్ చేసింది. "భారతీయులారా, మీకు చాలా థ్యాంక్స్. భుజంపై లేదా ఛాతీపై వేసుకునే దుపట్టాను మీరే కనిపెట్టారని నేను అనుకుంటున్నాను. ఒకవేళ నేను చెప్పింది తప్పయితే సరిదిద్దండి. కానీ దీనివల్ల నా దుస్తులు అక్షరాలా పది రెట్లు అందంగా కనిపిస్తున్నాయి" అని ఆమె ఆ వీడియోలో పేర్కొంది.

ఈ వీడియోకు సుమారు 20 లక్షల వ్యూస్, 75 వేలకు పైగా లైక్‌లు వచ్చాయి. భారతీయ ఫ్యాషన్‌కు సరైన గుర్తింపు ఇచ్చినందుకు నెటిజన్లు ఆమెను ప్రశంసలతో ముంచెత్తుతున్నారు. "మీరు చెప్పింది కరెక్ట్, దుపట్టాను కనిపెట్టింది భారతీయులే" అని ఒకరు కామెంట్ చేయగా, "భారత ఫ్యాషన్‌కు క్రెడిట్ ఇవ్వని ఎన్నో వీడియోలు చూసి విసుగొచ్చింది, కానీ ఇది చూశాక చాలా సంతోషంగా ఉంది" అని మరొకరు రాసుకొచ్చారు.

సాధారణంగా భారతీయ దుస్తులను తమ ఫ్యాషన్‌లో భాగంగా వాడుకునే కొందరు విదేశీయులు, వాటి మూలాలను ప్రస్తావించకపోవడంపై విమర్శలు వస్తుంటాయి. ఇటీవల టిక్‌టాక్‌లో ఒకరు దుపట్టాను 'యూరోపియన్, క్లాసీ స్కార్ఫ్' అని వర్ణించడం వివాదాస్పదమైంది. ఈ నేపథ్యంలో కెమి వీడియోలో దుపట్టా మూలాలను సరిగ్గా ప్రస్తావించడం అందరినీ ఆకట్టుకుంటోంది. ఈ సంఘటన భారతీయ సంప్రదాయ ఫ్యాషన్‌కు ప్రపంచవ్యాప్తంగా పెరుగుతున్న గౌరవాన్ని సూచిస్తోంది.