బీజేపీ జాతీయ అధ్యక్షుడిగా బాధ్యతలు చేపట్టిన నితిన్ నబీన్

బీజేపీ నూతన జాతీయ వర్కింగ్ ప్రెసిడెంట్‌గా నియమితులైన నితిన్ నబిన్ సోమవారం ఢిల్లీలో లాంఛనంగా బాధ్యతలు స్వీకరించారు. పార్టీ కేంద్ర కార్యాలయంలో ఆయనకు బీజేపీ అధిష్ఠానం ఘన స్వాగతం పలికింది. పార్టీ జాతీయాధ్యక్షుడు జేపీ నడ్డా స్వయంగా నితిన్ నబిన్‌ను కార్యాలయంలోకి ఆహ్వానించి, అభినందనలు తెలియజేశారు. ఈ సందర్భంగా నడ్డా తన అధికారిక ఎక్స్ ఖాతాలో ఒక సందేశాన్ని పోస్ట్ చేశారు.

"బీజేపీ జాతీయ వర్కింగ్ ప్రెసిడెంట్‌గా బాధ్యతలు స్వీకరించిన నితిన్ నబిన్‌కు హృదయపూర్వక అభినందనలు. మీ నాయకత్వంలో సంస్థ మరింతగా విస్తరిస్తుందని, ప్రధాని నరేంద్ర మోదీ ప్రభుత్వ విధానాలను, పార్టీ సిద్ధాంతాలను ప్రతి పౌరుడికి చేరువ చేస్తారని నేను విశ్వసిస్తున్నాను. మీ పదవీకాలం విజయవంతం కావాలని ఆకాంక్షిస్తున్నాను" అని నడ్డా పేర్కొన్నారు.

అంతేకాకుండా, "గౌరవనీయులైన ప్రధానమంత్రి నరేంద్ర మోదీ మార్గదర్శకత్వంలో, మీ సంస్థాగత నైపుణ్యాలు బీజేపీ ప్రజాసేవ, దేశ నిర్మాణ ప్రయాణానికి కొత్త దిశానిర్దేశం చేస్తాయి. బీజేపీ ప్రభుత్వ సంక్షేమ విధానాలను, పార్టీ సిద్ధాంతాలను మీరు మరింత సమర్థవంతంగా ప్రజల్లోకి తీసుకెళ్లగలరు. మీ నూతన బాధ్యతలకు, విజయవంతమైన పదవీకాలానికి నా శుభాకాంక్షలు" అని జేపీ నడ్డా తెలిపారు.

ఈ కార్యక్రమానికి హాజరైన కేంద్ర హోంమంత్రి అమిత్ షా కూడా నితిన్ నబిన్‌ను అభినందించారు. "బీజేపీ జాతీయ వర్కింగ్ ప్రెసిడెంట్‌గా బాధ్యతలు చేపట్టిన నితిన్ నబిన్‌కు అనేకానేక అభినందనలు. మీ నాయకత్వంలో సంస్థ మరింత పటిష్టమవుతుందని, నరేంద్ర మోదీ ప్రభుత్వ విధానాలు, పార్టీ సిద్ధాంతాలు ప్రజల్లోకి మరింత సమర్థవంతంగా వెళతాయని నేను విశ్వసిస్తున్నాను. మీ పదవీకాలం విజయవంతం కావాలని కోరుకుంటున్నాను" అని అమిత్ షా అన్నారు.

ఆదివారం బీజేపీ జాతీయ వర్కింగ్ ప్రెసిడెంట్‌గా నియమితులైన నితిన్ నబిన్, సోమవారం బాధ్యతలు స్వీకరించేందుకు న్యూఢిల్లీకి చేరుకున్నారు. ఈ పదవిని చేపట్టిన వారిలో ఆయనే అత్యంత పిన్న వయస్కుడు కావడం గమనార్హం. ఆయన వయసు 45 సంవత్సరాలు.

సోమవారం ఉదయం ఢిల్లీలోని ఇందిరాగాంధీ అంతర్జాతీయ విమానాశ్రయానికి చేరుకున్న ఆయనకు ఢిల్లీ బీజేపీ అధ్యక్షుడు వీరేంద్ర సచ్‌దేవా స్వాగతం పలికారు.