ఆటోలో ఆ ఒక్క మెసేజ్... అర్ధరాత్రి ప్రయాణంలో మహిళకు భరోసా!

బెంగళూరులో అర్ధరాత్రి రాపిడో ఆటోలో ప్రయాణిస్తున్న ఓ మహిళకు ఊహించని అనుభవం ఎదురైంది. ఆటో డ్రైవర్ చూపిన ఓ చిన్నపాటి చొరవ ఆమెకు ఎంతో భద్రతా భావాన్ని కలిగించింది. ఈ అనుభవాన్ని ఆమె వీడియో తీసి సోషల్ మీడియాలో పోస్ట్ చేయగా, అది ఇప్పుడు వైరల్ అవుతోంది.

ఓ మహిళ రాత్రి 12 గంటల సమయంలో రాపిడో ఆటో ఎక్కింది. ఒంటరిగా ప్రయాణిస్తున్న ఆమెకు కాస్త ఆందోళనగా అనిపించినప్పటికీ, ఆటో లోపల అతికించి ఉన్న ఒక నోట్ చూడగానే ఆమె మనసు కుదుటపడింది. ఆటో డ్రైవర్ సీటు వెనుక "నేను కూడా ఓ తండ్రిని, సోదరుడిని. మీ భద్రత ముఖ్యం. సౌకర్యంగా కూర్చోండి" అని రాసి ఉంది.

ఈ నోట్ చదివిన వెంటనే ఆమెకు ధైర్యం వచ్చింది. "ఈ మెసేజ్ చదివాక నాకు చాలా సురక్షితంగా అనిపించింది" అని చెబుతూ ఆమె ఈ దృశ్యాన్ని వీడియో తీశారు. @littlebengalurustories అనే ఇన్‌స్టాగ్రామ్ ఖాతాలో పోస్ట్ చేసిన ఈ వీడియోను ఇప్పటికే 3.7 లక్షల మందికి పైగా వీక్షించారు.

ఈ వీడియోపై నెటిజన్లు ప్రశంసల వర్షం కురిపిస్తున్నారు. "ఇదే అసలైన బెంగళూరు నగర స్ఫూర్తి" అని, "దేశంలోనే ఇది అత్యంత సురక్షితమైన నగరం" అని కామెంట్లు పెడుతున్నారు. గత నెలలో కూడా ఆశా మానే అనే మహిళ ప్రయాణిస్తున్న రాపిడో బైక్ పాడవ్వగా, డ్రైవర్ దాన్ని బాగుచేసి మరీ ఆమెను సురక్షితంగా ఇంటికి చేర్చిన ఘటనను పలువురు గుర్తుచేసుకున్నారు. ఇలాంటి కొద్దిమంది మంచి వ్యక్తుల వల్లే మానవత్వంపై నమ్మకం నిలుస్తోందని పలువురు అభిప్రాయపడుతున్నారు.