రెండో టీ20లో టీమిండియా ఓటమి... తిలక్ వర్మ ఒంటరిపోరు వృథా

సఫారీలతో జరిగిన రెండో టీ20 మ్యాచ్‌లో ఆతిథ్య భారత్ ఓటమిపాలైంది. ముల్లన్ పూర్ లో దక్షిణాఫ్రికా అద్భుతమైన ఆల్‌రౌండ్ ప్రదర్శనతో అదరగొట్టింది. బ్యాటింగ్, బౌలింగ్ విభాగాల్లో పూర్తి ఆధిపత్యం ప్రదర్శించి 51 పరుగుల భారీ తేడాతో ఘన విజయం సాధించింది. క్వింటన్ డికాక్ (90) మెరుపు ఇన్నింగ్స్‌కు, ఒట్నీల్ బార్ట్‌మన్ (4/24) అద్భుత బౌలింగ్ తోడవడంతో టీమిండియాకు ఓటమి తప్పలేదు. తిలక్ వర్మ (62) ఒంటరి పోరాటం చేసినా ఫలితం లేకుండా పోయింది.

214 పరుగుల కొండంత లక్ష్యంతో బరిలోకి దిగిన టీమిండియాకు ఆరంభంలోనే గట్టి ఎదురుదెబ్బ తగిలింది. శుభ్‌మన్ గిల్ (0) తొలి బంతికే వెనుదిరగ్గా, అభిషేక్ శర్మ (17), కెప్టెన్ సూర్యకుమార్ యాదవ్ (5) స్వల్ప స్కోర్లకే పెవిలియన్ చేరారు. దీంతో 32 పరుగులకే 3 వికెట్లు కోల్పోయి కష్టాల్లో పడింది. ఈ దశలో క్రీజులోకి వచ్చిన యువ బ్యాటర్ తిలక్ వర్మ (34 బంతుల్లో 62; 2 ఫోర్లు, 5 సిక్సర్లు) ఒంటరి పోరాటం చేశాడు. హార్దిక్ పాండ్య (20), జితేష్ శర్మ (27)తో కలిసి భాగస్వామ్యాలు నిర్మించాడు. అయితే, టీమిండియా బ్యాటర్లు పెరిగిన రన్‌రేట్ ఒత్తిడిని తట్టుకోలేకపోయారు.

ఒకవైపు తిలక్ వర్మ పోరాడుతున్నా, మరోవైపు వికెట్లు పడుతూనే ఉన్నాయి. దక్షిణాఫ్రికా బౌలర్లు కట్టుదిట్టంగా బంతులు వేసి భారత బ్యాటర్లను కట్టడి చేశారు. ముఖ్యంగా ఒట్నీల్ బార్ట్‌మన్ నాలుగు కీలక వికెట్లు పడగొట్టి భారత పతనాన్ని శాసించాడు. అతనికి మార్కో యాన్సెన్, లుంగి ఎంగిడి, సిపామ్లా తలో రెండు వికెట్లతో చక్కటి సహకారం అందించారు. ఫలితంగా భారత జట్టు 19.1 ఓవర్లలో 162 పరుగులకు ఆలౌట్ అయి ఓటమిని అంగీకరించింది.

అంతకుముందు, టాస్ గెలిచి బౌలింగ్ ఎంచుకున్న భారత్ నిర్ణయం తప్పని దక్షిణాఫ్రికా బ్యాటర్లు నిరూపించారు. ఓపెనర్ క్వింటన్ డికాక్ ఆకాశమే హద్దుగా చెలరేగాడు. కేవలం 46 బంతుల్లో 5 ఫోర్లు, 7 భారీ సిక్సర్లతో 90 పరుగులు చేసి భారత బౌలర్లకు చుక్కలు చూపించాడు. కెప్టెన్ మార్‌క్రమ్ (29)తో కలిసి రెండో వికెట్‌కు 83 పరుగుల కీలక భాగస్వామ్యం నెలకొల్పాడు. 

చివర్లో డొనోవాన్ ఫెరీరా (16 బంతుల్లో 30), డేవిడ్ మిల్లర్ (12 బంతుల్లో 20) మెరుపులు మెరిపించడంతో దక్షిణాఫ్రికా నిర్ణీత 20 ఓవర్లలో 4 వికెట్ల నష్టానికి 213 పరుగుల భారీ స్కోరు చేసింది. భారత బౌలర్లలో వరుణ్ చక్రవర్తి (2/29) ఒక్కడే కాస్త పొదుపుగా బౌలింగ్ చేయగా, అర్ష్‌దీప్ సింగ్ (54), జస్‌ప్రీత్ బుమ్రా (45) భారీగా పరుగులు సమర్పించుకున్నారు.

కాగా, ఈ విజయంతో 5 మ్యాచ్ ల టీ20 సిరీస్ ను దక్షిణాఫ్రికా 1-1తో సమం చేసింది. ఇరు జట్ల మధ్య మూడో టీ20 మ్యాచ్ డిసెంబరు 14న ధర్మశాలలో జరగనుంది.