బిగ్‌బాస్ వల్లే నా కెరీర్ నాశనమైంది: కరాటే కల్యాణి

తెలుగులో అత్యంత ఆదరణ పొందిన రియాలిటీ షో బిగ్‌బాస్‌పై ప్రముఖ సినీ నటి కరాటే కల్యాణి సంచలన ఆరోపణలు చేశారు. ఆ షోలో పాల్గొనడం వల్ల తనకు లాభం కంటే నష్టమే ఎక్కువ జరిగిందని, తన సినీ కెరీర్‌కు తీవ్ర ఆటంకం కలిగిందని ఆమె ఆవేదన వ్యక్తం చేశారు. తాజాగా ఓ ఛానల్‌కు ఇచ్చిన ఇంటర్వ్యూలో ఈ వ్యాఖ్యలు చేశారు.

ఆమె మాట్లాడుతూ, ‘‘నేను బిగ్‌బాస్‌లోకి వెళ్లడం వల్ల లాభం కంటే నష్టమే ఎక్కువ జరిగింది. అక్కడ సంపాదించిన దానికన్నా రెండింతలు నష్టపోయాను. ఆ షో అగ్రిమెంట్ కారణంగా నాకు సినిమా అవకాశాలు పూర్తిగా తగ్గిపోయాయి. సినిమాలు లేవు, అవకాశాలు లేవు. షోకు వెళ్తే అవకాశాలు కల్పిస్తామని చెప్పారు, కానీ బయటకు వచ్చాక నన్ను ఎవరూ పట్టించుకోలేదు. ఇది నన్ను చాలా బాధపెట్టింది. బిగ్‌బాస్ షో వల్లే నేను ఇండస్ట్రీకి కూడా దూరం కావాల్సి వచ్చింది’’ అని తెలిపారు.

కరాటే కల్యాణి చేసిన ఈ వ్యాఖ్యలు సోషల్ మీడియాలో వైరల్‌గా మారాయి. తెలుగులో ఎంతోమందికి పాప్యులారిటీ, సినిమా అవకాశాలు తెచ్చిపెట్టిన బిగ్‌బాస్ షోపై ఆమె ఇలాంటి ఆరోపణలు చేయడం చర్చనీయాంశంగా మారింది. అయితే, కొందరు నెటిజన్లు ఆమె వ్యాఖ్యలను విమర్శిస్తున్నారు. షో వల్ల నష్టం జరుగుతున్నప్పుడు ఎందుకు అంత ఆసక్తితో వెళ్తున్నారని ప్రశ్నిస్తున్నారు. మరికొందరు మాత్రం ఆమె చెప్పిన దాంట్లో నిజం ఉండవచ్చని అభిప్రాయపడుతున్నారు.