బీహార్ ఎన్నికలు: రూ. 37 కోట్ల విలువైన మద్యం, నగదు, డ్రగ్స్ పట్టివేత

బీహార్ అసెంబ్లీ ఎన్నికల నేపథ్యంలో ఓటర్లను ప్రలోభపెట్టేందుకు తరలిస్తున్న డబ్బు, మద్యం ప్రవాహానికి ఎన్‌ఫోర్స్‌మెంట్ ఏజెన్సీలు కళ్లెం వేస్తున్నాయి. ఎన్నికల ప్రవర్తనా నియమావళి అమల్లోకి వచ్చినప్పటి నుంచి రాష్ట్రవ్యాప్తంగా విస్తృతంగా తనిఖీలు నిర్వహిస్తూ ఇప్పటివరకు మొత్తం రూ.37.14 కోట్ల విలువైన నగదు, మద్యం, మాదకద్రవ్యాలు, ఇతర వస్తువులను స్వాధీనం చేసుకున్నట్లు రాష్ట్ర ప్రధాన ఎన్నికల అధికారి కార్యాలయం వెల్లడించింది.

బుధవారం ఒక్కరోజే రాష్ట్రంలో వివిధ ప్రాంతాల్లో జరిపిన దాడుల్లో రూ.1.28 కోట్ల విలువైన సొత్తును అధికారులు పట్టుకున్నారు. ఇందులో రూ.78.7 లక్షల విలువైన మద్యం, రూ.25 లక్షల విలువైన మాదకద్రవ్యాలు, రూ.20 లక్షల విలువైన విలువైన లోహాలు, రూ.15 లక్షల విలువైన ఇతర ఉచితాలు, రూ.10 లక్షల నగదు ఉన్నట్లు అధికారులు ఒక ప్రకటనలో తెలిపారు.

ఎన్నికల కోడ్ అమల్లోకి వచ్చిన నాటి నుంచి ఇప్పటివరకు జప్తు చేసిన వాటిలో రూ.16.11 కోట్ల విలువైన మద్యం, రూ.6.69 కోట్ల విలువైన మాదకద్రవ్యాలు, రూ.4.94 కోట్ల విలువైన బంగారం, వెండి వంటి లోహాలు, రూ.2.15 కోట్ల నగదు ఉన్నట్లు స్పష్టం చేశారు. వీటితో పాటు ఓటర్లకు పంచేందుకు సిద్ధం చేసిన రూ.7.23 కోట్ల విలువైన ఇతర వస్తువులను కూడా సీజ్ చేశారు.

ప్రలోభాలతో పాటు హింసను ప్రేరేపించే అక్రమ ఆయుధాలపై కూడా అధికారులు ప్రత్యేక దృష్టి సారించారు. ఇప్పటివరకు రాష్ట్రంలో 221 అక్రమ తుపాకులు, 1,487 తూటాలు, ఐదు పేలుడు పదార్థాలను స్వాధీనం చేసుకున్నారు. అక్రమంగా ఆయుధాలు తయారు చేస్తున్న 14 కేంద్రాలపై దాడులు నిర్వహించి మూసివేయించారు. మరోవైపు, లైసెన్సులు ఉన్న ఆయుధాల్లో 33.3 శాతం డిపాజిట్ చేయించగా, 798 లైసెన్సులను రద్దు చేసి, 669 ఆయుధాలను సీజ్ చేశారు.

ఎన్నికలను నిష్పక్షపాతంగా, పారదర్శకంగా నిర్వహించడమే లక్ష్యంగా జిల్లా యంత్రాంగం, పోలీస్, ఎక్సైజ్, ఆదాయపు పన్ను శాఖ, నార్కోటిక్స్ బ్యూరో, కస్టమ్స్, ఫ్లయింగ్ స్క్వాడ్ బృందాలు సమన్వయంతో పనిచేస్తున్నాయని ఎన్నికల సంఘం స్పష్టం చేసింది. బీహార్ అసెంబ్లీకి నవంబర్ 6, 11 తేదీల్లో రెండు దశల్లో పోలింగ్ జరగనుండగా, నవంబర్ 14న ఓట్ల లెక్కింపు చేపట్టనున్నారు.