నిమ్స్ ఆసుపత్రి అగ్ని ప్రమాదంపై స్పందించిన దామోదర రాజనర్సింహ

హైదరాబాద్‌లోని నిమ్స్ ఆసుపత్రి అత్యవసర విభాగంలోని ఐదో అంతస్తులో సంభవించిన ప్రమాదంపై మంత్రి దామోదర రాజనర్సింహ స్పందించారు. ఈ దుర్ఘటనలో ఎవరికీ ఎలాంటి హాని జరగలేదని తెలిపారు. ఆస్తి నష్టం కూడా స్వల్పంగానే వాటిల్లిందని వెల్లడించారు. ఈ ఘటనకు సంబంధించి నిమ్స్ డైరెక్టర్‌తో ఫోన్ ద్వారా మాట్లాడి వివరాలు తెలుసుకున్నట్లు ఆయన పేర్కొన్నారు.

వేసవి కాలంలో అగ్ని ప్రమాదాలు సంభవించే అవకాశం ఎక్కువగా ఉంటుందని మంత్రి అన్నారు. ఈ నేపథ్యంలో అధికారులు, ఆసుపత్రి సిబ్బంది అప్రమత్తంగా ఉండాలని సూచించారు. రోగులందరినీ సురక్షిత గదుల్లోకి తరలించినట్లు తెలిపారు. నిమ్స్ అత్యవసర విభాగం ఐదో అంతస్తులో ప్రమాదవశాత్తూ మంటలు చెలరేగగా, అగ్నిమాపక సిబ్బంది వాటిని అదుపులోకి తెచ్చారు.