Sunrisers Hyderabad: ఓడిపోయినా ... అవార్డులు ఇచ్చుకున్న సన్ రైజర్స్!
సన్ రైజర్స్ హైదరాబాద్ జట్టు నిన్న ముంబయి ఇండియన్స్ చేతిలో ఓటమిపాలవడం తెలిసిందే. ముంబయి వాంఖడే స్టేడియంలో జరిగిన ఈ మ్యాచ్ లో సన్ రైజర్స్ 4 వికెట్ల తేడాతో పరాజయం చవిచూసింది. అయినప్పటికీ, ఈ మ్యాచ్ లో కీలక ప్రదర్శన చేసిన ఆటగాళ్లకు సన్ రైజర్స్ సపోర్టింగ్ స్టాఫ్ అవార్డులు ఇచ్చి ఉత్సాహపరిచింది.
మ్యాచ్ ముగియగానే డ్రెస్సింగ్ రూంలో ఈ అవార్డుల కార్యక్రమం నిర్వహించారు. బ్యాట్స్ మన్ అనికేత్ వర్మ 8 బంతుల్లో 18 పరుగులు చేసి అజేయంగా నిలవడాన్ని ప్రత్యేకంగా ప్రస్తావించారు. అతడికి రైజర్ ఆఫ్ ద మ్యాచ్ అవార్డు అందించారు.
మైదానంలో పాదరసంలా కదులుతూ మెరుపు ఫీల్డింగ్ చేసిన తెలుగుతేజం నితీశ్ కుమార్ రెడ్డికి సేవర్ ఆఫ్ ద గేమ్ అవార్డు ఇచ్చారు.
3 వికెట్లు తీసి పోరాడిన కెప్టెన్ ప్యాట్ కమిన్స్ కు ప్లేయర్ ఆఫ్ ద డే అవార్డు లభించింది. దీనికి సంబంధించిన వీడియోను సన్ రైజర్స్ హైదరాబాద్ సోషల్ మీడియాలో పంచుకుంది.
