రామ్ చరణ్ కొత్త ‘అవతార్’.. ఇదిగో!

ఆర్ఆర్ఆర్ చిత్రం విజయంతో ప్రపంచ స్థాయి గుర్తింపు తెచ్చుకున్నారు మెగా పవర్ స్టార్ రామ్ చరణ్. కెరీర్ ఆరంభం నుంచి ఆయన వైవిధ్యమైన కథలను ఎంచుకుంటూ ముందుకెళ్తున్నారు. ప్రతీసారి ఓ ప్రత్యేక కథ, సినిమా, క్యారెక్టర్ తో ముందుకొచ్చే ప్రయత్నం చేస్తున్నారు. ఆర్ఆర్ఆర్ లో సీతా రామరాజు పాత్రలో మెప్పించిన ఆయన ఇప్పుడు శంకర్ దర్శకత్వంలో ఓ భారీ బడ్జెట్ సినిమాలో నటిస్తున్నారు. చరణ్ కెరీర్ లో ఇది 15వ సినిమా. ‘ఆర్‌‌సి 15’ వర్కింగ్ టైటిల్‌తో వేగంగా తెరకెక్కుతోంది. ఇందులో చరణ్ ద్విపాత్రాభినయం చేస్తున్నారు. రెండు పాత్రల కోసం రెండు భిన్నమైన గెటప్స్ లో కనిపించబోతున్నాడు. ఈ సినిమా షూటింగ్ లో భాగంగా ఇప్పటికే ఓ పాత్ర లుక్ లో చరణ్ బయట కనిపించారు. ఇప్పుడు రెండో పాత్ర కోసం ఆయన ప్రత్యేకంగా మేకోవర్ అయ్యారు. 

ఇందుకోసం సెలబ్రిటీల హెయిర్ స్టయిలిస్ట్ ఆలిమ్ హాకిమ్ ను ఆశ్రయించారు. హాకిమ్ తనదైన శైలిలో చరణ్‌కి కొత్త హెయిర్ స్టయిల్ చేసి ఆ ఫొటోను సోషల్ మీడియాలో పోస్ట్ చేశాడు. ‘మా సూపర్ డూపర్ స్టార్ మరొక కొత్త అవతార్‌‌లో కనిపించడానికి రెడీ’ అని ట్వీట్ చేశాడు. చెర్రీ స్టయిల్ గా, మోడర్న్ గా ఉన్న ఈ లుక్ వైరల్ అయ్యింది. కాగా, ఈ చిత్రంలో చరణ్ సరసన కియారా అద్వానీ హీరోయిన్ గా నటిస్తోంది. ఈ మధ్యే బాలీవుడ్ హీరో సిద్దార్థ్ మల్హోత్రాను పెళ్లి చేసుకున్న కియారా త్వరలోనే తిరిగి షూటింగ్ కు హాజరవనుంది. దిల్‌ రాజు నిర్మిస్తున్న ఈ సినిమాకు తమన్ సంగీతం అందిస్తున్నారు.