హిందీ ‘దృశ్యం 2’కి కలెక్షన్ల వర్షం.. తొలివారంలోనే వంద కోట్ల క్లబ్ దిశగా పరుగులు

అలియా భట్, రణబీర్ కపూర్ జంటగా నటించిన ‘బ్రహ్మాస్త్ర’ తర్వాత అజయ్ దేవగణ్ నటించిన ‘దృశ్యం2’ బాక్సాఫీస్ వద్ద మళ్లీ జోష్ నింపింది. ఈ మధ్య బాలీవుడ్ ప్రముఖులకు చెందిన చిత్రాలన్నీ బోల్తా కొడుతుండగా.. అజయ్ దేవగణ్ హిట్ ఖాతాలో వేసుకున్నారు. అదే సమయంలో ఈ చిత్రానికి మంచి వసూళ్లు కూడా వస్తున్నాయి. దృశ్యం2 ఈ నెల 18వ తేదీన విడుదలైంది. ఒక వారం కూడా పూర్తి కాకుండానే ఈ చిత్రం పలు రికార్డులను బద్దలు కొడుతోంది. ఈ చిత్రం బాలీవుడ్ బాక్సాఫీస్ దగ్గర రూ.86 కోట్లకు పైగా వసూళ్లను సాధించింది. ఈ చిత్రంలో టబు, అక్షయ్ ఖన్నా, శ్రియా శరణ్ ఇతర ప్రధాన పాత్రల్లో నటించారు. 

ఈ చిత్రానికి తొలి రోజు రూ. 15.38 కోట్ల వసూళ్లు వచ్చాయి. ఆ తర్వాత కూడా ప్రతి రోజూ రూ. 10–15 కోట్లకు పైనే వసూళ్లు వస్తున్నాయి. మంగళవారం దృశ్యం 2 మొత్తం 18.27 శాతం హిందీ ఆక్యుపెన్సీ సాధించింది. ఈ లెక్కన ఈ చిత్రం మొదటి వారంలోనే 100 కోట్ల క్లబ్‌ లో చేరేలా కనిపిస్తోందని ట్రేడ్ వర్గాలు చెబుతున్నాయి. ఈ చిత్రం ఇప్పటికే భూల్ భూలాయ 2, గంగూబాయి కతియావాడి, ది కశ్మీర్ ఫైల్స్ వంటి హిట్ బాలీవుడ్ చిత్రాల తొలి వారాంతపు కలెక్షన్లను అధిగమించింది. ఈ ఏడాదిలో అత్యధిక వసూళ్లు సాధించిన హిందీ చిత్రాలలో ఒకటిగా నిలిచే అవకాశం కూడా ఉంది.