ప్రభాస్ 'సలార్' టీజర్ ముహూర్తం ఖరారు.. ఎప్పుడు రిలీజ్ అవుతోందంటే..!

ఇప్పుడు యావత్ దేశం ఎదురు చూస్తున్న చిత్రం 'సలార్'. పాన్ ఇండియా స్టార్ ప్రభాస్, 'కేజీఎఫ్'ను తెరకెక్కించిన స్టార్ డైరక్టర్ ప్రశాంత్ నీల్ కలయికలో ఈ చిత్రం తెరకెక్కుతోంది. హైఓల్టేజ్ ఎంటర్టైనర్ గా ఈ చిత్రం షూటింగ్ జరుపుకుంటోంది. ఈ సినిమా టీజర్ కోసం అభిమానులు ఎంతో ఆతృతగా ఎదురు చూస్తున్నారు. వాస్తవానికి మే చివరి వారంలోనే టీజర్ రావాల్సి ఉంది. అయితే షూటింగ్ ఆలస్యం కావడంలో నిర్ణీత సమయానికి రాలేకపోయింది.  

తాజాగా ఈ చిత్రం టీజర్ కు సంబంధించి ఒక లేటెస్ట్ అప్ డేట్ వచ్చింది. జులై రెండో వారంలో టీజర్ విడుదల కాబోతోందని, దీనికి సంబంధించి త్వరలోనే మేకర్స్ నుంచి అధికారిక ప్రకటన రానుందట. యాక్షన్ సీక్వెన్సుల్లోని కొన్ని షాట్స్ ను ఈ టీజర్ లో చూపించబోతున్నట్టు సమాచారం. ఈ చిత్రంలో ప్రభాస్ సరసన శృతి హాసన్ నటిస్తోంది. మలయాళ స్టార్ పృథ్వీరాజ్ సుకుమారన్ ఓ కీలక పాత్రలో నటిస్తున్నారు. వచ్చే ఏడాది వేసవికి ఈ చిత్రాన్ని తీసుకొచ్చేందుకు మేకర్స్ సన్నాహకాలు చేస్తున్నారు.