మా నానమ్మ పుట్టిన గది ఇదే!: ఫోటో పోస్ట్ చేసిన ప్రియాంకా గాంధీ

ప్రస్తుతం యూపీలో కాంగ్రెస్ ప్రచార బాధ్యతలను భుజాన వేసుకున్న ప్రియాంకా గాంధీ, ఓ ఆసక్తికర ఫోటోను కాంగ్రెస్ శ్రేణులతో పంచుకున్నారు. ప్రస్తుతం ప్రయాగ్ రాజ్ లో తన పూర్వీకుల నివాసంలో సేదదీరుతున్న ఆమె, తన నానమ్మ, మాజీ ప్రధాని ఇందిరాగాంధీ జన్మించిన గది చిత్రాన్ని తన సోషల్ మీడియాలో షేర్ చేశారు.

ఇక్కడి స్వరాజ్ భవన్ లో ఇందిర జన్మించిన ఫోటోను పోస్ట్ చేసిన ఆమె, "స్వరాజ్ భవన్ లో నేనున్న వేళ, నానమ్మ పుట్టిన గదిని చూశాను. ఇదే సమయంలో ఆమె నాకు చెప్పిన 'జోన్ ఆఫ్ ఆర్క్' కథ గుర్తుకొచ్చింది. ఆ కథ వింటూ నేను నిద్రపోవడం గుర్తొచ్చింది. ఆమె గొంతు ఇప్పటికీ నా హృదయంలో వినిపిస్తోనే ఉంది. భయం లేకుండా ఉండాలని, అప్పుడే అంతా మంచి జరుగుతుందని ఆమె చెప్పేవారు" అని వ్యాఖ్యానించారు.