'బాహుబలి' స్టంట్ చేయబోయి ఆసుపత్రి పాలైన యువకుడు.. వీడియో చూడండి!

'బాహుబలి 2' మూవీలో ప్రభాస్ చేసిన స్టంట్ ను రియల్ గా చేయాలని భావించిన యువకుడు చావుతప్పి కన్నులొట్టబోయిన చందంగా ఆసుపత్రిపాలైన ఘటన కేరళలో చోటుచేసుకుంది. ఈ వివరాల్లోకి వెళ్తే... కేరళలోని తిరువనంతపురం సమీపంలోని ఇడుక్కి థోడుపూఝాలో 'బాహుబలి 2' ప్రభాస్ చేసిన విన్యాసం చేస్తానని, తన స్నేహితుడ్ని వీడియో తీయాలని కోరాడు. దానికి అంగీకరించిన ఆ యువకుడు వీడియో తీయడం మొదలు పెట్టాడు. దీంతో సాహసం చేయాలనుకున్న యువకుడు ఒక ఏనుగు దగ్గరకి వెళ్లి దానికి అరటిపండు అందించాడు. దానిని అది ఆనందంగా అందుకుంది.

తరువాత దాని తలపై సుతారంగా ముద్దు పెట్టాడు. అప్పుడు కూడా మౌనంగా ఉంది. అంతటితో ఆగని ఆ యువకుడు మెల్లగా దాని దంతాలు పట్టుకుని పైకి ఎక్కేందుకు ప్రయత్నించాడు. దీంతో తిక్కరేగిన ఏనుగు తొండంతో అతనిని నేలకేసి విసిరికొట్టింది. క్షణమాగితే తొక్కి పేగులు బయటకు తీసేదే.. అయితే వీడియో తీస్తున్న యువకుడు వేగంగా స్పందించి, అతనిని రక్షించి, గాయాలపాలైన అతనిని ఆసుపత్రిలో చేర్చాడు. దీంతో చావుతప్పి కన్నులొట్టబోయిందిరా బాబూ అనుకుంటూ వైద్యచికిత్స పొందుతున్నాడు. ఈ వీడియో సోషల్ మీడియాలో వైరల్ గా మారింది. దానిని మీరు కూడా చూడండి.