'హయగ్రీవ' (అమెజాన్ ప్రైమ్) మూవీ రివ్యూ!

కన్నడలో 'ధన్వీర' కథానాయకుడిగా నటించిన సినిమానే 'హయగ్రీవ'. రఘు కుమార్ దర్శకత్వం వహించిన ఈ సినిమా, ఫిబ్రవరి 26వ తేదీన థియేటర్లకు వచ్చింది. క్రైమ్ థ్రిల్లర్ జోనర్లో రూపొందిన ఈ సినిమాలో కథానాయికగా సంజనా ఆనంద్ నటించింది. ఈ ఏడాది ఫిబ్రవరి 27వ తేదీన థియేటర్లకు వచ్చిన ఈ సినిమా, మే 22వ తేదీ నుంచి 'అమెజాన్ ప్రైమ్'లో స్ట్రీమింగ్ అవుతోంది. ప్రస్తుతం ఈ సినిమా కన్నడలో మాత్రమే అందుబాటులో ఉంది. 

బెంగుళూర్ లో క్రైమ్ బ్రాంచ్ కి సంబంధించిన పోలీస్ ఆఫీసర్ గా అర్జున్ హయగ్రీవ (ధన్వీర) పనిచేస్తుంటాడు. ఆయన భార్య ఐశ్వర్య ( సంజనా ఆనంద్) ఒక కార్పొరేట్ హాస్పిటల్లో డాక్టర్ గా ఉంటుంది. పెళ్లి తరువాత అర్జున్ హయగ్రీవ మరింత బిజీ అవుతాడు. సిటీలో వరుస హత్యలు జరుగుతూ ఉంటాయి. శవాలు లభిస్తున్న తీరు పోలీసులను సైతం కంగారు పెడుతూ ఉంటుంది.  మనిషి దేహానికి మృగాల .. జంతువుల 'తల'ను అమర్చడం చూసి ప్రజలు భయభ్రాంతులకు గురవుతుంటారు.
            
హంతకుడు ఒక సైకో. అతను ఒక్కడే ఈ హత్యలను చేస్తున్నాడనే విషయం హయగ్రీవకి నిర్ధారణ అవుతుంది. హంతకుడికి వైద్య శాస్త్రంపై మంచి అవగాహన ఉందనే విషయం అర్థమవుతుంది.  అయితే అతను ఎందుకు ఈ హత్యలను చేస్తున్నాడు? మనిషి తలను తీసేసి, జంతువుల తలలను ఎందుకు పెడుతున్నాడు? అనేది హయగ్రీవకి అర్థం కాదు. ఎలాంటి ఆధారాలు లభించకపోయినా, ఆ సైకో కిల్లర్ గురించి గాలించడం మొదలుపెడతాడు.

అసలు ఆ సైకో కిల్లర్ ఎలా ఉంటాడు? హత్యలు చేయడానికి ఎవరిని ఎలా ఎంచుకుంటున్నాడు? శరీరం నుంచి తలను వేరు చేసి .. జంతువుల 'తల'ను తగిలించే ఈ కార్యక్రమాన్ని అతను ఎక్కడ చేస్తున్నాడు? అనే విషయాన్ని కనుక్కోవడానికి హయగ్రీవ ఒక ప్లాన్ చేస్తాడు. అదేమిటి? తన కోసం హయగ్రీవ తీవ్రంగా గాలిస్తున్నాడని తెలుసుకున్న ఆ సైకో ఏం చేస్తాడు? అసలు అతను ఇదంతా ఎందుకు చేస్తున్నాడు? అనే ఆసక్తికరమైన అంశాలతో కూడుకున్న కథ ఇది.

 పిల్లలు ఎదుగుతున్నప్పుడే వాళ్ల ప్రవర్తనను తల్లిదండ్రులు గమనిస్తూ ఉండాలి. ఏ విషయాన్ని వాళ్లు ఎలా తీసుకుంటున్నారు? ఎలా ఆలోచిస్తున్నారు? అనేది పరిశీలన చేస్తూ ఉండాలి. లేదంటే ఇతరులకంటే తేడాగా తాము ఆలోచన చేస్తున్నామనే విషయం మరిచిపోయి, తాము నమ్మినదే చేస్తూ సైకోలుగా మారిపోతారు. అలాంటి ఒక సైకో కిల్లర్ చుట్టూ తిరిగే కథ ఇది. అతణ్ణి పట్టుకోవడానికి పరిగెత్తే ఒక పోలీస్ ఆఫీసర్ కథ ఇది. 

ధైర్యవంతుడైన ఒక సిన్సియర్ పోలీస్ ఆఫీసర్ .. భయమనేది తెలియని ఒక 'సైకో పాత్' చుట్టూ దర్శకుడు ఈ కథను అల్లుకుంటూ వెళ్లాడు. సైకోలు ఎలాంటి ప్రత్యేకతలతో కనిపించరు. చాలా సాధారణంగా కనిపిస్తూనే, దారుణాలకు పాల్పడుతూ ఉంటారు. అందువలన వాళ్లను గుర్తించడానికీ .. పట్టుకోవడానికి పోలీసులు నానా అవస్థలు పడుతుంటారు. ఈ కథ కూడా అదే పద్ధతిలో నడుస్తుంది. 

ఇక ఒక వ్యక్తి సైకోగా మారిపోవడానికి వెనుక ఒక బలమైన కారణం ఉంటుంది. అలాంటి ఒక కారణం ఈ సినిమాలో ఫ్లాష్ బ్యాక్ గా వస్తుంది. కారణంగా అంత బలంగా లేని ఈ ఎపిసోడ్, ఓ మాదిరిగా అనిపిస్తుంది. ఇక సైకో ఎటాక్ చేయడం .. హత్యలు చేయడం వంటి సన్నివేశాలు పరమ రొటీన్ గా అనిపిస్తాయి. పోస్టుమార్టం టేబుల్ పై శవాలను .. తలలేని మొండాలను క్లోజప్ లో చూపించడం కాస్త ఇబ్బంది పెడుతుంది. 

ఇలాంటి కథల్లో అసలు ఈ హత్యలు ఎవరు చేస్తున్నారనేది దర్శకుడు రివీల్ చేసేవరకూ  ఆడియన్స్ కి తెలియకూడదు. కానీ దర్శకుడు ముందుగానే చూపించిన ఒక్క సీన్ వలన ఆ ఇంపాక్ట్ పోయిందని అనిపిస్తుంది. ఒక రకంగా అది స్క్రీన్ ప్లే లోని లోపంగానే చెప్పుకోవాలి. ఆయా పాత్రలను ఆడియన్స్ అనుమానించేలా ఆ పాత్రలతో ఒక చిన్న 'లుక్' ఇప్పించడం సిల్లీగా అనిపిస్తుంది.

కథ పాతదే .. కథనం కూడా పాత పద్ధతిని ఫాలో అయిందే. పోలీస్ ఇన్వెస్టిగేషన్ కి సంబంధించిన హడావిడి లేకుండా తాపీగా నడవడమే ఈ కథలోని లోపాలలో ముఖ్యమైనదిగా చెప్పుకోవాలి. ప్రీ క్లైమాక్స్ .. క్లైమాక్స్ సమయాలలోను కథనం వేగాన్ని పుంజుకోలేదు. కథను పురాణాలతో లింక్ చేసిన తీరు కొత్తగా అనిపిస్తుంది గానీ .. దానిని కనెక్ట్ చేయలేకపోయారు. ధన్వీర నటన బాగానే ఉంది. సంజనా ఆనంద్ చేయడానికేమీ లేదు. సైకో పాత్రను పోషించిన ఆర్టిస్ట్ నటన ఫరవాలేదు. మిగతా పాత్రలకు ఎలాంటి ప్రాధాన్యత లేదు.

గిరీశ్ గౌడా ఫొటోగ్రఫీ బాగుంది. జుదా శాండీ సంగీతం ఓ మాదిరిగా అనిపిస్తుంది. ప్రకాశ్ ఎడిటింగ్ ఫరవాలేదు. ఒక సైకో .. అతణ్ణి ప్రభావితం చేసే ఒక ఫ్లాష్ బ్యాక్ .. ఆ సైకోను పట్టుకోవడానికి పోలీస్ ఆఫీసర్ డిజైన్ చేసే వ్యూహాలు .. చివరికి ఉచ్చులో పడేలా చేయడం .. వంటి కథలతో గతంలో చాలానే కథలు వచ్చాయి. ఆ కథలకు ఏ మాత్రం భిన్నంగా లేని సినిమా ఇది. రొటీన్ కథను రొటీన్ గానే చెప్పిన కంటెంట్ ఇది.