ఫ్లైఓవర్‌పై భార్య బర్త్‌డే హంగామా.. బిజినెస్ మేన్ అరెస్ట్

గౌహతికి చెందిన ఓ ప్రముఖ వ్యాపారవేత్త, నూతనంగా నిర్మించిన ఫ్లైఓవర్‌పై తన భార్య పుట్టినరోజు వేడుకలను ఘనంగా నిర్వహించి చిక్కుల్లో పడ్డాడు. ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో, ప్రజల నుంచి వ్యక్తమైన తీవ్ర వ్యతిరేకత నడుమ పోలీసులు మంగళవారం ఆయనను అదుపులోకి తీసుకున్నారు.

గౌహతి, ఉత్తర గౌహతిలను అనుసంధానించే 'కుమార్ భాస్కర్ వర్మ సేతు' ఫ్లైఓవర్‌పై జూన్ 21 అర్ధరాత్రి ఈ ఘటన చోటుచేసుకుంది. తన భార్య పుట్టినరోజు వేడుకల కోసం వ్యాపారవేత్త గౌతమ్ బారువా ఫ్లైఓవర్‌పై రెడ్ కార్పెట్ పరిచి, బెలూన్లు మరియు ఇతర అలంకరణలతో ఓ ప్రైవేట్ వేదికను తలపించేలా ఏర్పాట్లు చేశారు. పలు విలాసవంతమైన కార్లను సైతం వంతెనపైనే నిలిపివేయడంతో ఇతర వాహనదారుల రాకపోకలకు తీవ్ర అంతరాయం కలిగింది.

ఈ దృశ్యాలు సామాజిక మాధ్యమాల్లో వైరల్ కావడంతో పోలీసులు సుమోటోగా కేసు నమోదు చేశారు. భారతీయ న్యాయ సంహిత (బీఎన్ఎస్) కింద ప్రజా జీవనానికి ఆటంకం కలిగించడం, ట్రాఫిక్ నిబంధనలు ఉల్లంఘన వంటి సెక్షన్ల కింద చర్యలు చేపట్టారు. ఈ ఘటనకు సంబంధించి గౌతమ్ బారువాను అదుపులోకి తీసుకున్న పోలీసులు, సుమారు 14 మందిని విచారించారు. వేడుకకు ఉపయోగించిన లగ్జరీ వాహనాలను కూడా స్వాధీనం చేసుకున్నారు.

ప్రజా రవాణా కోసం నిర్మించిన ఫ్లైఓవర్‌ను వ్యక్తిగత వేడుకలకు వినియోగించడంపై సర్వత్రా విమర్శలు వెల్లువెత్తాయి. ఇది ప్రజా భద్రతకు ముప్పు కలిగించడమే కాకుండా, పౌర క్రమశిక్షణను ఉల్లంఘించడమేనని నెటిజన్లు ఆగ్రహం వ్యక్తం చేశారు. ఫ్లైఓవర్‌పై వేడుక నిర్వహించడానికి ముందస్తు అనుమతులు ఏమైనా తీసుకున్నారా అనే కోణంలో బారువాను విచారిస్తున్నామని, దర్యాప్తు ఆధారంగా తదుపరి చర్యలు తీసుకుంటామని పోలీసులు వెల్లడించారు.