Kavya Maran: పాక్ ఆటగాడిని కొనుగోలు చేసిన కావ్యా మారన్... మండిపడుతున్న అభిమానులు

ఇంగ్లండ్‌లో జరిగే 'ది హండ్రెడ్' పురుషుల లీగ్ వేలంలో పాకిస్థాన్ లెగ్ స్పిన్నర్ అబ్రార్ అహ్మద్‌ను సన్‌రైజర్స్ లీడ్స్ ఫ్రాంచైజీ కొనుగోలు చేయడం పెద్ద వివాదానికి దారితీసింది. గురువారం జరిగిన వేలంలో అబ్రార్‌ను రూ. 2.34 కోట్లకు (190,000 పౌండ్లు) దక్కించుకుంది. సన్‌రైజర్స్ హైదరాబాద్ ఐపీఎల్ జట్టు యజమాని అయిన సన్ టీవీ గ్రూప్‌కు చెందినదే ఈ ఫ్రాంచైజీ కావడంతో, ఈ నిర్ణయంపై భారత అభిమానులు సోషల్ మీడియాలో తీవ్ర ఆగ్రహం వ్యక్తం చేస్తున్నారు.

గతంలో అబ్రార్ అహ్మద్ టీ తాగుతున్న ఫొటోతో, ఆసియా కప్‌లో అనుచిత సంబరాలతో భారత్‌ను, భారత ఆటగాళ్లను ఎగతాళి చేశాడని నెటిజన్లు ఆరోపిస్తున్నారు. "భారత్‌ను అవమానించిన ఆటగాడిని కొనడం సిగ్గుచేటు" అంటూ సన్‌రైజర్స్ ఫ్రాంచైజీపైనా, ఆ ఫ్రాంచైజీ యజమాని కావ్యా మారన్ పైనా విమర్శలు గుప్పిస్తున్నారు. ఈ నిర్ణయంతో ఫ్రాంచైజీ పరువు పోయిందని పలువురు కామెంట్లు పెడుతున్నారు.

2009 నుంచి ఐపీఎల్‌లో పాకిస్థానీ ఆటగాళ్లు ఆడటం లేదు. ఇతర దేశాల లీగ్స్‌లో కూడా భారత ఫ్రాంచైజీ యజమానులు పాక్ ఆటగాళ్లను తీసుకోవడానికి దూరంగా ఉంటారు. ఈ నేపథ్యంలో సన్‌రైజర్స్ లీడ్స్ పాక్ ఆటగాడిని తీసుకోవడం చర్చనీయాంశమైంది. గతంలో నార్తర్న్ సూపర్‌చార్జర్స్‌గా ఉన్న ఈ జట్టును ఇటీవలే సన్ టీవీ గ్రూప్ కొనుగోలు చేసి సన్‌రైజర్స్ లీడ్స్‌గా మార్చింది.

అయితే, ఆటగాళ్ల ఎంపిక కేవలం వారి ఆటతీరు, లభ్యత, జట్టు అవసరాలపైనే ఆధారపడి ఉంటుందని ఇంగ్లండ్ క్రికెట్ బోర్డు (ఈసీబీ) స్పష్టం చేసింది. ఇదే వేలంలో మరో పాక్ ఆటగాడు ఉస్మాన్ తారిఖ్‌ను బర్మింగ్‌హామ్ ఫీనిక్స్ కొనుగోలు చేయగా, హరీస్ రవూఫ్, షాదాబ్ ఖాన్ వంటి స్టార్ ప్లేయర్లు అమ్ముడుపోలేదు. అబ్రార్‌తో పాటు సన్‌రైజర్స్ లీడ్స్ జట్టు జాక్ క్రాలీ, ర్యాన్ రికెల్టన్, మాట్ పాట్స్ వంటి ఆటగాళ్లను కూడా కొనుగోలు చేసింది. ఈ జట్టుకు హ్యారీ బ్రూక్ కెప్టెన్‌గా ఉన్నాడు.