Nithiin: విఐ ఆనంద్‌తో నితిన్ సై-ఫై థ్రిల్లర్.. ఆసక్తి రేపుతున్న ఫస్ట్ లుక్!

టాలీవుడ్ యంగ్ హీరో నితిన్ తన తదుపరి చిత్రాన్ని అధికారికంగా ప్రకటించారు. వినూత్న కథాంశాలతో విజయాలు అందుకున్న దర్శకుడు విఐ ఆనంద్‌తో నితిన్ చేతులు కలిపారు. వీరిద్దరి కాంబినేషన్‌లో ఓ సైన్స్ ఫిక్షన్ థ్రిల్లర్ రాబోతున్నట్టు చిత్రబృందం వెల్లడించింది. నితిన్ కెరీర్‌లో 36వ చిత్రంగా రానున్న ఈ సినిమాపై ఆదివారం అధికారిక ప్రకటన వెలువడింది.

ప్రముఖ నిర్మాణ సంస్థ శ్రీనివాస సిల్వర్ స్క్రీన్ ఈ చిత్రాన్ని నిర్మిస్తోంది. ఈ సందర్భంగా 'నితిన్36' పోస్టర్‌ను సోషల్ మీడియాలో విడుదల చేసింది. ఇందులో నితిన్ సిగరెట్ తాగుతున్నట్లు ఉన్న సిల్హౌట్ చిత్రాన్ని చూపిస్తూ, "నో బాడీ.. నో రూల్స్" అనే ట్యాగ్‌లైన్‌ను జతచేశారు. ఇది మునుపెన్నడూ వినని కథ అని, సరికొత్త అనుభూతిని పంచుతుందని నిర్మాణ సంస్థ పేర్కొంది.

ఈ ప్రాజెక్ట్‌పై దర్శకుడు విఐ ఆనంద్ స్పందిస్తూ, "ప్రతిభావంతుడైన నటుడు నితిన్‌తో కలిసి ఈ సై-ఫై ఎంటర్‌టైనర్ కోసం పనిచేయడం సంతోషంగా ఉంది" అని తన ఎక్స్ ఖాతాలో తెలిపారు. "రియాలిటీ నియమాలు మారిపోయాయి. ఈ ప్రయాణాన్ని ప్రారంభించడానికి ఆసక్తిగా ఎదురుచూస్తున్నా" అని హీరో నితిన్ పోస్ట్ చేశారు.

గతంలో విఐ ఆనంద్ దర్శకత్వంలో 'ఎక్కడికి పోతావు చిన్నవాడా', 'ఊరు పేరు భైరవకోన' వంటి విజయవంతమైన చిత్రాలు వచ్చాయి. నితిన్ గతేడాది 'తమ్ముడు' చిత్రంతో ప్రేక్షకులను పలకరించారు. త్వరలోనే ఈ సినిమా షూటింగ్ ప్రారంభం కానుంది.