ఒకే పోస్టుతో నోళ్లు మూయించిన సాయిపల్లవి.. బికినీ వివాదానికి చెక్!

తనవంటూ సోషల్ మీడియాలో చక్కర్లు కొట్టిన బికినీ ఫొటోల వివాదానికి ప్రముఖ నటి సాయిపల్లవి ఒకే ఒక్క పోస్టుతో ఫుల్ స్టాప్ పెట్టారు. ఎటువంటి ఆర్భాటం లేకుండా, ఎవరినీ విమర్శించకుండా చాలా తెలివిగా వ్యవహరించి అభిమానుల ప్రశంసలు అందుకుంటున్నారు. సహజ నటన, సంప్రదాయానికి ప్రాధాన్యత ఇచ్చే ఆమె ఇమేజ్‌ను దెబ్బతీసేలా జరిగిన ఈ ప్రచారంపై ఆమె స్పందించిన తీరు అందరినీ ఆకట్టుకుంటోంది.

గత కొద్ది రోజులుగా సాయిపల్లవి బికినీ ధరించారంటూ కొన్ని ఫొటోలు ఇంటర్నెట్‌లో వైరల్ అయ్యాయి. తన సోదరితో కలిసి బీచ్‌లో ఉన్నట్లుగా ఉన్న ఈ చిత్రాలపై పెద్ద చర్చే జరిగింది. కొందరు ఆమె వ్యక్తిగత స్వేచ్ఛకు మద్దతు పలకగా, మరికొందరు ఆమె ఇమేజ్‌కు ఇది తగదంటూ కామెంట్లు చేశారు. అయితే, చాలామంది ఇవి ఆర్టిఫిషియల్ ఇంటెలిజెన్స్ (ఏఐ) సాయంతో సృష్టించిన మార్ఫింగ్ ఫొటోలని అనుమానం వ్యక్తం చేశారు. ఈ గందరగోళంపై సాయిపల్లవి మౌనంగా ఉండటంతో చర్చ మరింత పెరిగింది.

ఈ నేపథ్యంలో సాయిపల్లవి తాజాగా తన ఇన్‌స్టాగ్రామ్ ఖాతాలో కొన్ని కొత్త ఫొటోలు, వీడియోలు పోస్ట్ చేశారు. వాటికి ‘‘పైన కనిపిస్తున్న ఫొటోలు నిజమైనవే.. ఏఐతో చేసినవి కావు’’ అని క్యాప్షన్ జోడించారు. తను ఇప్పుడు పెట్టిన ఫొటోలే అసలైనవని చెప్పడం ద్వారా అంతకుముందు వైరల్ అయిన బికినీ ఫొటోలు ఫేక్ అని పరోక్షంగా స్పష్టం చేశారు. దీంతో ఈ వివాదానికి తెరపడినట్లయింది.

ఆమె పోస్టుపై నెటిజన్లు భారీగా స్పందిస్తున్నారు. ‘‘ఒకే పోస్టుతో విమర్శకుల నోళ్లు మూయించావ్’’, ‘‘నువ్వు బికినీ వేస్తావంటే మేము నమ్మం’’, ‘‘నీ సమయస్ఫూర్తికి హ్యాట్సాఫ్’’ అంటూ ప్రశంసల వర్షం కురిపిస్తున్నారు. కాగా, సాయిపల్లవి ప్రస్తుతం రణ్‌బీర్ కపూర్ హీరోగా తెరకెక్కుతున్న ప్రతిష్ఠాత్మక చిత్రం ‘రామాయణ’లో సీత దేవి పాత్రలో నటిస్తున్నారు. ఈ సినిమాతో ఆమె బాలీవుడ్‌లో అడుగుపెడుతున్నారు.