అప్పుడు అలా అనుకున్నా.. ద‌ర్శ‌కుల‌పై ప్ర‌శాంత్ నీల్ కీల‌క వ్యాఖ్య‌లు!

కేజీఎఫ్ చాప్ట‌ర్‌-1, 2ల‌తో పాటు 'స‌లార్' మూవీతో క‌న్న‌డ ద‌ర్శ‌కుడు ప్ర‌శాంత్ నీల్ దేశ‌వ్యాప్తంగా గుర్తింపు పొందిన విష‌యం తెలిసిందే. ప్ర‌స్తుతం యంగ్‌టైగ‌ర్ ఎన్‌టీఆర్‌తో ఒక సినిమాను తెర‌కెక్కిస్తున్నారు. అయితే, తాజాగా ఆయ‌న న‌టి అమ‌ల‌తో క‌లిసి పాల్గొన్న ఓ కార్య‌క్ర‌మంలో తాను సినీ ప‌రిశ్ర‌మ‌లోకి వ‌చ్చిన కొత్త‌లో త‌న‌కు ఎలాంటి ఆలోచ‌న ఉండేదో వివ‌రించారు. ఆ స‌మ‌యంలో అప్ప‌టివ‌ర‌కూ సినిమాలు తీసిన వారంద‌రూ బ్యాడ్ డైరెక్ట‌ర్స్‌ అని భావించానని... తానే చిత్ర ప‌రిశ్ర‌మ‌లో మార్పులు తీసుకురావాల‌ని భావించార‌ట‌. కానీ, ఆ త‌ర్వాత వాస్త‌వం గ్ర‌హించాన‌ని నీల్ పేర్కొన్నారు. 

"సినిమా చూడ‌టం అనేది తేలికైన ప‌ని. కానీ, తెర‌కెక్కించ‌డం చాలా క‌ష్టం. 2014లో నేను తీసిన తొలి మూవీ 'ఉగ్రం'. ఈ సినిమా షూటింగ్ ప్రారంభంకాక ముందు... 'ఇప్ప‌టివ‌ర‌కూ సినిమాలు తెర‌కెక్కించిన వారంతా బ్యాడ్ డైరెక్ట‌ర్స్ (నవ్వుతూ). చిత్ర ప‌రిశ్ర‌మ‌లో మ‌న‌మే మార్పు తీసుకురావాలి' అని అనుకునేవాడిని. కానీ, మూవీ చిత్రీక‌ర‌ణ కొంత భాగం పూర్త‌య్యాక అస‌లు విష‌యం అర్థ‌మైంది. 

ఈ సినిమా 10 మంది వీక్షించినా చాలు అనిపించింది. మూవీ నిర్మాణానికి టీమ్ వ‌ర్క్ చాలా అవ‌స‌ర‌మ‌ని, అప్పుడే విజ‌యం సాధించ‌గ‌ల‌మ‌ని గ్ర‌హించాను. అందుకే ఫిల్మ్ మేకింగ్ అనేది టెన్నిస్‌లాంటిది కాదు, క్రికెట్‌లాంటిది. జ‌ట్టుగా ప‌నిచేయాల్సి ఉంటుంది" అని ప్ర‌శాంత్ నీల్ అన్నారు.