రూ.200 కోట్ల బడ్జెట్‌తో లారెన్స్‌ సినిమా!

కొరియోగ్రాఫర్‌గా, నటుడిగా, దర్శకుడిగా అందరికి సుపరిచితుడైన లారెన్స్‌ రాఘవ 'కాలభైరవ'గా ప్రేక్షకుల ముందుకు రాబోతున్నాడు. ఆయన హీరోగా నటిస్తున్న ఈ చిత్రానికి ఇంతకు ముందు రాక్షసుడు, ఖిలాడి చిత్రాలను తెరకెక్కించిన రమేష్‌ వర్మ దర్శకుడు. కోనేరు సత్యనారాయణ ఈ చిత్రాన్ని నిర్మిస్తున్నారు. తెలుగు, తమిళ, హిందీ భాషల్లో రూపొందనున్న ఈ చిత్రాన్ని రూ.200 కోట్ల వ్యయంతో నిర్మిస్తున్నట్టు చిత్ర యూనిట్‌ చెబుతోంది. 

యాక్షన్‌ అడ్వెంచరస్‌ మూవీగా రూపొందనున్న ఈ చిత్రం ఫస్ట్‌లుక్‌ను మేకర్స్‌ విడుదల చేశారు. త్వరలో చిత్రీకరణ ప్రారంభం కానున్న ఈ చిత్రాన్ని వచ్చే ఏడాది వేసవిలో విడుదల చేయడానికి సన్నాహాలు చేస్తున్నారు. కాంచన, గంగ, డ్యాన్స్‌ వంటి చిత్రాలతో నటుడిగా తన ప్రతిభను చాటుకున్న రాఘవ లారెన్స్‌ ఈ చిత్రంలో పూర్తి మాస్‌ పాత్రలో కనిపించనున్నాడు. ఈ చిత్రానికి సంబంధించిన మరిన్నివివరాలు త్వరలోనే తెలుస్తాయి.