Tanikella Bharani: ‘తగ్గక్కర్లా’ అంటూ అల్లు అర్జున్‌ను కవితతో అభినందించిన తనికెళ్ల భరణి!
- ఉత్తమ జాతీయ నటుడి అవార్డుకు ఎంపికైన అల్లు అర్జున్
- రెండు రోజులుగా ప్రశంసల వెల్లువ
- అల్లూ విల్లుతో తెలుగు వాళ్ల బాకీ చెల్లు అంటూ తనికెళ్ల భరణి కవిత
తెలుగు సినీ చరిత్రలో తొలిసారి ఉత్తమ జాతీయ నటుడి అవార్డుకు ఎంపికై అల్లు అర్జున్ రికార్డు సృష్టించిన విషయం తెలిసిందే. పుష్ప సినిమాలో నటనకు గాను ఆయన ఈ అవార్డు అందుకోబోతున్నారు. ఆయనకు సినీ రాజకీయ ప్రముఖుల నుంచి ప్రశంసలు వెల్లువెత్తాయి. రెండు రోజులు గడిచినా ఇంకా అల్లు అర్జున్‌కు అభినందనలు కొనసాగుతూనే ఉన్నాయి. తాజాగా సీనియర్ నటుడు, రచయిత తనికెళ్ల భరణి కూడా బన్నీకి కంగ్రాట్స్ చెప్పారు. వినూత్నంగా ఓ కవితతో అభినందనలు తెలిపారు.
‘‘అర్జునుడై గురిపెట్టెను అల్లూ తన విల్లు.. శతాబ్దాల తెలుగు వాళ్ల బాకీ ఇక చెల్లు..” అని కవిత వినిపించారు. ఈ మేరకు వీడియోను ట్విట్టర్‌‌లో షేర్ చేశారు. ‘తగ్గేదే లే’ అంటూ పుష్పలో బన్నీ చెప్పే డైలాగ్‌ను గుర్తు చేస్తూ ‘తగక్కర్లా’ అంటూ క్యాప్షన్ ఇచ్చారు. ప్రస్తుతం ఈ వీడియో వైరల్ అవుతోంది.
