అంతా రెడీ .. ఇక ఆగేదే లేదంటున్న బన్నీ!

అల్లు అర్జున్ - సుకుమార్ కాంబినేషన్లో రూపొందిన 'పుష్ప' సంచలన విజయాన్ని సాధించింది. విడుదలైన ప్రతి భాషలో .. ప్రతి ప్రాంతంలో వసూళ్ల పరంగా కొత్త రికార్డులను నమోదు చేసింది. ఆ సినిమాకి సీక్వెల్ గా 'పుష్ప 2' సెట్స్ పైకి వెళ్లనుందనే సంగతి అందరికీ తెలిసిందే. అయితే ఫస్టు పార్టు పాన్ ఇండియా స్థాయిలో కనెక్ట్ కావడంతో, సెకండ్ పార్టును ఆ స్థాయి బడ్జెట్ లోనే నిర్మిస్తున్నారు. 

ముందుగా అనుకున్న కథలో మార్పులు చేసుకోవడం .. మరికొంతమంది స్టార్స్ ను యాడ్ చేసుకోవడం వలన మరికాస్త ఆలస్యమైంది. ఇక ఇప్పుడు ప్రీ ప్రొడక్షన్ పనులన్నీ పూర్తి చేశారట. నవంబర్ నుంచి రెగ్యులర్ షూటింగును మొదలెట్టనున్నారని సమాచారం. ఆ తరువాత నుంచి పెద్దగా గ్యాప్ లేకుండా షూటింగు కానిచ్చేస్తారని అంటున్నారు. 

ఈ సినిమాలో రష్మికతో పాటు మరో కథానాయికకి కూడా చోటు ఉంటుందని అంటున్నారు. తమిళం నుంచి విజయ్ సేతుపతిని .. బాలీవుడ్ నుంచి అర్జున్ కపూర్ ను తీసుకున్నట్టుగా చెబుతున్నారు. ఇక ఇప్పటికే దేవిశ్రీ మాస్ మసాలా ట్యూన్స్ ను సిద్ధం చేశాడని టాక్. ఐటమ్ సాంగులో కాజల్ మెరవనుందనే ప్రచారం కూడా జోరుగానే జరుగుతోంది.