తనకి పంపిన రెండు కోట్లు విజయ్ వెనక్కి తిరిగి పంపించాడు: పూరి జగన్నాథ్

పూరి జగన్నాథ్ తాజా చిత్రంగా రూపొందిన 'లైగర్' ఈ నెల 25వ తేదీన పాన్ ఇండియా స్థాయిలో థియేటర్లకు రానుంది. ఈ నేపథ్యంలో ఈ సినిమా టీమ్ ప్రమోషన్స్ లో బిజీగా ఉంది. నిన్న వరంగల్ లో ఏర్పాటు చేసిన ఈవెంట్ లో ఈ టీమ్ సందడి చేసింది. పూరి .. చార్మీ .. విజయ్ దేవరకొండ .. అనన్య పాండే తదితరులు ఈ కార్యక్రమంలో పాల్గొన్నారు.

ఈ వేదికపై పూరి మాట్లాడుతూ .. 'అర్జున్ రెడ్డి' చూసినప్పుడే విజయ్ తో సినిమా చేయాలని ఫిక్స్ అయ్యాను. విజయ్ సినిమాల్లోనే కాదు .. బయటకూడా అంతే నిజాయతీగా ఉంటాడు. తనలో నేను ఇష్టపడేది అదే. నిర్మాతగా నేను ఒక రోజున తనకి 2 కోట్లు పంపించాను. మాకు వేరే చోట అప్పు ఉందని తెలిసిన తను, ముందుగా ఆ అప్పు తీర్చమని ఆ డబ్బు వెనక్కి పంపించాడు. 

ఈ రోజుల్లో ఇలాంటివాడు ఉంటాడా చెప్పండి? ఒక నిర్మాత కష్టాల్లో ఉన్నప్పుడు అండగా నిలబడేవాళ్లు ఎవరు? విజయ్ లాంటి  హీరోను నేను ఇంతవరకూ చూడలేదు. నా కష్టనష్టాలను తనవిగా భావించి అండగా నిలబడిన తనకి హ్యాట్సాఫ్ చెబుతున్నాను. ఈ సినిమా విజయ్ ను తప్పకుండా నెక్స్ట్ లెవెల్ కి తీసుకుని వెళుతుందని భావిస్తున్నాను" అంటూ చెప్పుకొచ్చాడు.