Vijay Antony: అసలు హంతకులు ఎవరు? : ఆసక్తిని రేకెత్తిస్తున్న 'హత్య' మోషన్ పోస్టర్!

'బిచ్చగాడు' సినిమాతో తెలుగులో విజయ్ ఆంటోనీ పాప్యులర్ అయ్యాడు. అప్పటి నుంచి ఆయన తమిళంలో చేసిన ప్రతి సినిమా తెలుగు ప్రేక్షకులను కూడా పలకరిస్తోంది. 'బిచ్చగాడు' తరువాత ఆయన చాలా ప్రయోగాలు చేశాడు. ఆ సినిమాను దాటి మిగతా సినిమాలు ఆడలేదు. ఆయనకి ఆ స్థాయి పేరును తీసుకుని రాలేదు. 

అయినా ఆయన నిరాశ పడకుండా తనవంతు ప్రయత్నాలు చేస్తూనే ఉన్నాడు. ఆయన కథానాయకుడిగా తమిళంలో 'కొలై' రూపొందింది. లోటస్ పిక్చర్స్ వారు నిర్మించిన ఈ సినిమాకి బాలాజీ కుమార్ దర్శకత్వం వహించాడు. తెలుగులో ఈ సినిమాకి 'హత్య' అనే టైటిల్ ను ఖరారు చేశారు. తాజాగా ఈ సినిమా నుంచి ఒక మోషన్ పోస్టర్ ను రిలీజ్ చేశారు. 

ఒక హత్య కేసును ఛేదించే డిటెక్టివ్ గా విజయ్ ఆంటోని ఈ సినిమాలో కనిపించనున్నాడనే విషయం ఈ మోషన్ పోస్టర్ ద్వారా అర్థమైపోతోంది. మోషన్ పోస్టర్ తోనే సినిమాపై ఆసక్తిని పెంచారని చెప్పచ్చు. మీనాక్షి చౌదరి కథానాయికగా నటించిన ఈ సినిమాలో, వరలక్ష్మి శరత్ కుమార్ ఒక కీలకమైన పాత్రను పోషించింది. త్వరలోనే ఈ సినిమా ప్రేక్షకుల ముందుకు రానుంది