'శ్రీవల్లి' పాటను అద్భుతంగా ఆలపించిన నెదర్లాండ్స్ గాయని... వీడియో చూసి ఫిదా అయిన దేవీ శ్రీప్రసాద్

'పుష్ప' చిత్రం ఎంత పెద్ద హిట్టయిందో, అందులోని 'శ్రీవల్లి' పాట అంతకంటే ఎక్కువగా ప్రజల్లోకి వెళ్లింది. ఈ పాట ఖండాంతరాలు దాటి యూరప్ లోనూ మోత మోగిస్తోంది. తాజాగా 'శ్రీవల్లి' పాటను నెదర్లాండ్స్ కు చెందిన ప్రముఖ గాయని ఎమ్మా హీస్టర్స్ అద్భుతంగా ఆలపించి, ఆ వీడియోను యూట్యూబ్ లో విడుదల చేసింది. శ్రీవల్లి పాట ప్రారంభంలో ఇంగ్లీషు లిరిక్స్ కూడా జోడించింది.

ఈ వీడియో సోషల్ మీడియాలో వైరల్ కావడంతో పుష్ప సంగీత దర్శకుడు దేవి శ్రీప్రసాద్ దృష్టికి వచ్చింది. ఆయన ఈ వీడియో చూసి ముగ్ధుడయ్యారు. "హేయ్ సిద్ శ్రీరామ్ బ్రో... ఈ పాట రికార్డు చేస్తున్నప్పుడు శ్రీవల్లి ఇంగ్లీష్ వెర్షన్ కూడా చేయాలని మనం అనుకున్నాం కదా... అయితే ఈ పాటకు అద్భుతమైన కవర్ సాంగ్ వచ్చింది... ఇదిగో!" అంటూ ఎమ్మా హీస్టర్స్ పాడిన పాట తాలూకు వీడియోను కూడా పంచుకున్నారు.