నాని చేతుల మీదుగా 'ఓసీఎఫ్ఎస్' టీజ‌ర్ విడుద‌ల‌.. చాలా స‌ర‌దాగా ఉంద‌ని నేచుర‌ల్ స్టార్ కితాబు

జీ5లో ప్ర‌సారం కానున్న  ఓసీఎఫ్ఎస్ (ఒక చిన్న ఫ్యామిలీ స్టోరీ ) వెబ్ సిరీస్ టీజ‌ర్‌ను నేచుర‌ల్ స్టార్ నాని ఈ రోజు విడుద‌ల చేశాడు. 'ఇదిగో ఒక చిన్న ఫ్యామిలీ స్టోరీ టీజ‌ర్. ఈ వెబ్ సిరీస్ బృందానికి నా బెస్ట్ విషెస్.. టీజ‌ర్ చాలా స‌ర‌దాగా ఉంది' అని నాని పేర్కొన్నాడు. ఈ వెబ్ సిరీస్‌కు నిర్మాతగా నాగ‌బాబు కుమార్తె నిహారిక వ్యవహరిస్తోన్న విష‌యం తెలిసిందే.
             
ఫ్యామిలీ ఎంటర్టైన్ మెంట్ గా రూపుదిద్దుకున్న ఈ వెబ్ సిరీస్‌ జీ5లో నవంబర్ 19న  ప్రారంభం కానుంది. ఈ వెబ్ సిరీస్  40 నిమిషాల నిడివి చొప్పున‌ మొత్తం 5 ఎపిసోడ్లుగా ప్రేక్ష‌కుల ముందుకు రానుంది. ఇందులో సంతోష్ శోభన్, సిమ్రాన్ శర్మ హీరో హీరోయిన్లుగా న‌టిస్తుండ‌గా, సీనియర్ నటీనటులు నరేశ్, తులసి కీలక పాత్రలు పోషిస్తున్నారు.