పిల్లాడి కాన్ఫిడెన్స్ చూసి ముచ్చటపడిపోయిన కేటీఆర్.. వీడియో ఇదిగో!

పిల్లాడే గానీ.. ఆ చిన్నారిలో ఆత్మవిశ్వాసం చూస్తే మాత్రం అచ్చెరువొందక తప్పదు. అవును మరి, ఆ బాలుడు తన జీవితం గురించి అంత కాన్ఫిడెంట్ గా ఉన్నాడు. ఆ చిన్నారి పేరు శ్రీ ప్రకాశ్. తెలంగాణలోని జగిత్యాల పట్టణం అతడి ఊరు. చదువుకుంటూనే న్యూస్ పేపర్ వేస్తుంటాడు. ఈ క్రమంలోనే పేపర్ వేస్తున్న ఆ చిన్నారిని అటుగా వెళ్తున్న ఓ వ్యక్తి పలకరించాడు.

చదువుకోవాల్సిన వయసులో పేపర్ ఎందుకు వేస్తున్నావ్? అని అడిగాడు. దీంతో ఆ అబ్బాయి.. ‘‘ఏం పేపర్ వేయకూడదా? అదేమైనా తప్పా? చదువుకుంటూనే పనిచేస్తున్నా. దాంట్లో తప్పేముంది?’’ అంటూ ఆ వ్యక్తికి సమాధానమిచ్చాడు. తన పేరు శ్రీ ప్రకాశ్ అని, స్థానిక ఓల్డ్ హైస్కూల్ చదువుతున్నానని చెప్పాడు. 'ఇప్పుడు కష్టపడితేనే భవిష్యత్ లో బాగుంటాం కదా!' అంటూ పెద్ద ఆరిందాలా ఆ చిన్నారి చెప్పుకొచ్చాడు.

అతడి మాటలకు మంత్రి కేటీఆర్ కూడా ఫిదా అయ్యారు. అతడి ఆత్మవిశ్వాస స్థాయులు అమోఘమని కొనియాడారు. ఆలోచనల్లో స్పష్టత, హావభావాలు అన్నీ సూపర్ అన్నారు. చదువుకుంటూ పనిచేయడంలో తప్పేముందన్న అతడి క్లారిటీ చూస్తే ముచ్చటేస్తోందని మెచ్చుకున్నారు.