మహేశ్ మూవీలో పోలీస్ ఆఫీసర్ గా అర్జున్!

యాక్షన్ కింగ్ అర్జున్ కథానాయకుడిగా చాలా తెలుగు సినిమాల్లో నటించారు. ఆ తరువాత తమిళంలోనే వరుస సినిమాలు చేసుకుంటూ వెళ్లారు. అక్కడ బిజీ కావడంతో తెలుగులో నేరుగా చేయలేకపోయారు. అయితే తమిళంలో ఆయన చేసిన చాలా సినిమాలు తెలుగులో అనువాదాలుగా రావడం వలన, ఆయన ఇక్కడి ఇండస్ట్రీకి దూరమైనట్టుగా ఎవరికీ అనిపించలేదు. ఈ మధ్య కాలంలో ఆయన తెలుగులో విలన్ గా కూడా చేస్తున్నారు. ఈ తరహా పాత్రల్లోను తనదైన స్టైల్ తో ప్రేక్షకులను ఆకట్టుకుంటున్నారు.

ఈ నేపథ్యంలోనే 'సర్కారువారి పాట' సినిమాలో ఆయన ఒక కీలకమైన పాత్రను చేస్తున్నట్టుగా వార్తలు వచ్చాయి. దాంతో ఈ సినిమాలో ఆయనే విలన్ అనుకున్నారు. కానీ ఈ సినిమాలో ఆయన విలన్ కాదట .. పవర్ఫుల్ పోలీస్ ఆఫీసర్ పాత్రలో కనిపించనున్నారని అంటున్నారు. గతంలో అర్జున్ పోలీస్ ఆఫీసర్ గా చేసిన చాలా సినిమాలు ప్రేక్షకులను ఆకట్టుకున్నాయి. అదే విధంగా ఈ సారి కూడా ఆయన మంచి మార్కులు కొట్టేయడం ఖాయమే. మహేశ్ బాబు హీరోగా పరశురామ్ దర్శకత్వంలో రూపొందుతున్న ఈ సినిమాలో, కథానాయికగా కీర్తి సురేశ్ అలరించనున్న సంగతి తెలిసిందే.