Minor Girl: బాలికపై ఎంఐఎం నేత అత్యాచారం..  రిమాండ్ కు తరలింపు!

బాలికపై అత్యాచారం చేసిన ఘటనలో ఎంఐఎం నేత షకీల్ ను పోలీసులు అరెస్ట్ చేసి రిమాండ్ కు తరలించారు. ఈ ఘటన హైదరాబాద్ చాదర్ ఘాట్ కమలానగర్ లో జరిగింది. ఈ సందర్బంగా బాధితురాలిని బీజేపీ నేతలు, దళిత సంఘాలు పరామర్శించాయి. అండగా ఉంటామని భరోసా ఇచ్చాయి. బీజేపీ ఎమ్మెల్సీ రామచంద్రరావు మాట్లాడుతూ, పాతబస్తీలో హిందువులకు రక్షణ లేకుండా పోయిందని చెప్పారు. షకీల్ కు ఎంఐఎం అండగా ఉందని ఆరోపించారు. ఈ కేసును ఫాస్ట్ ట్రాక్ కోర్టుకు అప్పగించాలని డిమాండ్ చేశారు.

మరోవైపు బాధితురాలిని ఎంఐఎం ఎమ్మెల్యే బలాలా పరామర్శించారు. అనంతరం ఆయన మీడియాతో మాట్లాడుతూ, బాధితురాలికి పార్టీ తరపున అండగా ఉంటామని చెప్పారు. నిందితుడికి శిక్షపడేలా చూస్తామని తెలిపారు. ఎమ్మెల్యే బలాలా బాధితురాలు ఇంటికి చేరుకున్న సమయంలో ఆయనకు వ్యతిరేకంగా స్థానికులు ఆందోళన చేశారు. ఎమ్మెల్యే గోబ్యాక్ అంటూ నినాదాలు చేశారు.

దీనిపై బలాలా మాట్లాడుతూ, నిందితుడికి తమ పార్టీతో సంబంధం లేదని చెప్పారు. ఫొటోలు పెట్టుకున్న వారంతా అనుచరులు  కాదని అన్నారు. ప్రధాని మోదీ ఫొటోను విజయ్ మాల్యా పెట్టుకున్నారని... అంత మాత్రాన మోదీని విమర్శిస్తే ఎలాగని ప్రశ్నించారు.