కేన్ విలియమ్సన్ ఒంటరి పోరు... ఆరు వికెట్లు కోల్పోయి పీకల్లోతు కష్టాల్లో న్యూజిలాండ్!

నేపియర్ లో జరుగుతున్న తొలి వన్డేలో టాస్ గెలిచి బ్యాటింగ్ ఎంచుకున్న న్యూజిలాండ్ జట్టులోని ప్రధాన ఆటగాళ్లెవరూ రాణించకపోవడంతో జట్టు పీకల్లోతు కష్టాల్లో పడింది. కేన్ విలియమ్సన్ మినహా మరెవరూ చెప్పుకోతగ్గ స్కోరు సాధించలేదు. ఓపెనర్లు ఎంజే గుప్టిల్ 5 పరుగులకు, మున్రో 8 పరుగులకు నిష్క్రమించిన తరువాత క్రీజులోకి అడుగుపెట్టిన విలియమ్సన్, భారత బౌలర్లను ఎదుర్కొంటూ స్కోరును ముందుకు సాగించాడు.

ఈ క్రమంలో తన హాఫ్ సెంచరీని పూర్తి చేసుకున్నాడు. అతనికి అండగా నిలుస్తాడనుకున్న టేలర్ 24, లాథమ్ 11 పరుగులకు, నికోల్స్ 12 పరుగులకు, శాంట్ నర్ 14 పరుగులకు పెవిలియన్ చేరారు. భారత బౌలర్లలో షమీకి 3 వికెట్లు, చాహాల్ కు 2, కేఎం జాదవ్ కు ఒక వికెట్ దక్కాయి. ప్రస్తుతం న్యూజిలాండ్ స్కోరు 33 ఓవర్లలో 6 వికెట్ల నష్టానికి 146 పరుగులు. విలియమ్సన్ 64 పరుగులతో ఉన్నాడు. సౌదీ, ఫెర్గ్యూసన్, బౌల్ట్ లు బ్యాటింగ్ కు దిగాల్సివుంది.