ఆ ఘనత రజనీకే సొంతమంటోన్న ఫ్యాన్స్

ప్రపంచవ్యాప్తంగా రజనీకాంత్ కి అభిమానులు వున్నారు. ఈ తరం స్టార్ హీరోలు సైతం ఆయన సినిమా విడుదల తేదీలను బట్టి తమ సినిమాల విడుదల తేదీలను మార్చుకుంటూ వుంటారు. సుదీర్ఘమైన ప్రయాణంలో రజనీ గ్రాఫ్ పెరుగుతూ పోయింది. మారుతోన్న ప్రేక్షకుల అభిరుచిని .. సాంకేతిక పరిజ్ఞానాన్ని దృష్టిలో పెట్టుకుని ఆయన సినిమాలు చేసుకుంటూ వచ్చారు. ఈ కారణంగా రజనీ పనైపోయింది అనే మాట ఎప్పుడూ ఎక్కడా వినిపించలేదు.

ఈ నేపథ్యంలో తమ అభిమాన కథానాయకుడు అరుదైన ఘనతను సొంతం చేసుకున్నాడంటూ రజనీ ఫ్యాన్స్ ఆనందాన్ని వ్యక్తం చేస్తున్నారు. రజనీ బ్లాక్ అండ్ వైట్ సినిమాలు చేశారు .. అలాగే కలర్ సినిమాల్లోను నటించారు .. 'కొచ్చాడియాన్'వంటి యానిమేటెడ్ చిత్రంలోను నటించారు. ఇక తాజాగా ఆయన హీరోగా '2.ఓ' త్రీడీ వెర్షన్ కూడా ప్రేక్షకుల ముందుకు వచ్చింది. ఇన్ని రకాల సినిమాల్లో నటించిన ఘనత ఇండియాలో తమ హీరోదేనంటూ వాళ్లు హర్షాన్ని వ్యక్తం చేస్తున్నారు.