మహేశ్ అభిమానులకు నమ్రత థ్యాంక్స్!

టాలీవుడ్ సూపర్ స్టార్ మహేశ్‌బాబు భార్య, నటి నమ్రతా శిరోద్కర్ సోషల్ మీడియాలో చాలా యాక్టివ్‌గా ఉంటుంటుంది. మహేశ్‌కి సంబంధించిన కొత్త సినిమాల అప్‌డేట్స్, ఫొటోలు, వీడియోలను ఎప్పటికప్పుడు ట్విట్టర్, ఇన్‌స్టాగ్రామ్‌ లాంటి సామాజిక మాధ్యమ వేదికల్లో పోస్ట్ చేస్తూ అభిమానులతో ఎప్పటికప్పుడు ఆమె కనెక్ట్ అవుతూనే ఉంటుంది.

తాజాగా మహేశ్ అభిమానులకు ఇన్‌స్టాగ్రామ్‌లో ఓ వీడియోని పోస్ట్ చేయడం ద్వారా ఆమె కృతజ్ఞతలు తెలిపింది. మహేశ్ బాబు తన షూటింగ్ ముగించుకుని తిరిగి వెళ్తుండగా అభిమానులు ఉల్లాసంగా అరుస్తూ తమ అభిమాన నటుడ్ని మొబైల్ కెమేరాల్లో బంధించేందుకు ప్రయత్నిస్తున్న వీడియోని ఆమె పోస్ట్ చేసింది. బహుశా, వారి అభిమానానికి ముగ్ధురాలై ఆమె ఇలా వీడియోని పోస్ట్ చేసినట్లుంది. తమపై వారు చూపిస్తున్న ప్రేమను తిరిగి అదే స్థాయిలో వారికి ఇలా పంచుతుండటం ఎంతైనా ఆహ్వానించదగ్గ విషయం.