స్టీల్ ఫ్లైఓవర్ నిర్మాణ పనులు.. హైదరాబాద్ బంజారాహిల్స్‌లో ట్రాఫిక్ సూచనలు ఇవే!

హైదరాబాద్ నగరంలోని బంజారాహిల్స్ రోడ్ నంబర్ 2 పరిసరాల్లో ప్రయాణించే వాహనదారులను ట్రాఫిక్ పోలీసులు అప్రమత్తం చేశారు. జూబ్లీహిల్స్ చెక్‌పోస్ట్ నుంచి ఎన్‌ఎఫ్‌సీఎల్ (NFCL) మధ్య స్టీల్ ఫ్లైఓవర్ నిర్మాణ పనులు జరుగుతున్న నేపథ్యంలో, బంజారాహిల్స్ రోడ్ నంబర్ 2లో తీవ్ర ట్రాఫిక్ రద్దీ ఏర్పడే అవకాశముందని హెచ్చరించారు. ఈ నిర్మాణ పనులు ఎంతకాలం సాగుతాయి, ట్రాఫిక్ మళ్లింపులు ఎప్పటివరకు అమల్లో ఉంటాయనే దానిపై ఇంకా అధికారికంగా తుది గడువును వెల్లడించలేదు.

ఈ నిర్మాణ పనుల కారణంగా ముఖ్యంగా రోడ్ నంబర్ 2లోని శ్రీనగర్ టీ-జంక్షన్ (SNT) నుంచి ఎన్టీఆర్ భవన్ మధ్య మార్గంలో రాకపోకలపై తీవ్ర ప్రభావం పడనుంది. ఈ క్రమంలో వాహనదారులు సాధ్యమైనంత వరకు రోడ్ నంబర్ 2 వైపు రాకుండా ప్రత్యామ్నాయ మార్గాలను చూసుకోవాలని, ప్రయాణాలను ముందుగానే ప్లాన్ చేసుకోవాలని ట్రాఫిక్ జాయింట్ పోలీస్ కమిషనర్ డి. జోయెల్ డేవిస్ సూచించారు. ముఖ్యంగా ఉదయం 8:30 నుంచి 11:00 గంటల వరకు, అలాగే సాయంత్రం 5:00 నుంచి రాత్రి 9:00 గంటల మధ్య పీక్ అవర్స్ రద్దీ తీవ్రంగా ఉంటుందని, ఈ సమయాల్లో ఆయా మార్గాలను నివారించడం ఉత్తమమని స్పష్టం చేశారు.

ఈ రద్దీని క్రమబద్ధీకరించేందుకు ట్రాఫిక్ పోలీసులు కీలక దారి మళ్లింపులను ప్రకటించారు:

శ్రీనగర్ కాలనీ నుంచి ఎస్ఎన్టీ (SNT) జంక్షన్ వైపు వెళ్లే వారు: 
రోడ్ నంబర్ 2 వైపునకు కుడి మలుపును పూర్తిగా మూసివేశారు. వాహనదారులు శ్రీనగర్ టీ-జంక్షన్ వద్ద ఎడమవైపు తిరిగి, ఎన్‌ఎఫ్‌సీఎల్ జంక్షన్ వరకు వెళ్లి అక్కడ యూ-టర్న్ తీసుకోవాల్సి ఉంటుంది.

బేగంపేట నుంచి ఎస్ఎన్టీ, సాగర్ సొసైటీ, కేబీఆర్ పార్క్, జూబ్లీహిల్స్ చెక్‌పోస్ట్, రోడ్ నంబర్ 36, 45 లేదా కేబుల్ బ్రిడ్జి వైపు వెళ్లే వారు: 
పంజగుట్ట ఫ్లైఓవర్ వై-జంక్షన్ వద్ద ఎడమవైపు తిరిగి తాజ్ కృష్ణా, రోడ్ నంబర్ 1 మీదుగా వెళ్లాలి. అనంతరం 1/10 బంజారాహిల్స్ జంక్షన్ వద్ద కుడి మలుపు తీసుకుని జహీరానగర్, బసవతారకం ఇండో-అమెరికన్ క్యాన్సర్ ఆస్పత్రి, అగ్రసేన్ ఐలాండ్ మీదుగా రోడ్ నంబర్ 45, 36, కేబుల్ బ్రిడ్జి, సైబరాబాద్, మాదాపూర్ ప్రాంతాలకు చేరుకోవచ్చు.

శ్రీనగర్ కాలనీ నుంచి ఎన్టీఆర్ భవన్ లేదా కేబుల్ బ్రిడ్జి వైపు ప్రయాణించే వారు: 
ఇందిరానగర్ గడ్డ మీదుగా వెంకటగిరి చేరుకుని, అక్కడి నుంచి జూబ్లీహిల్స్ రోడ్ నంబర్ 10, 36 ద్వారా మాదాపూర్ వైపు వెళ్లాల్సి ఉంటుంది.

ఎన్‌ఎఫ్‌సీఎల్ నుంచి ఎన్టీఆర్ భవన్, రోడ్ నంబర్ 45, 36 లేదా మాదాపూర్ వెళ్లే వారు: 
సాగర్ సొసైటీ టీ-జంక్షన్ వద్ద కుడివైపునకు మళ్లాలి. అక్కడి నుంచి శ్రీనగర్ కాలనీ మెయిన్ రోడ్డు మీదుగా ఇందిరానగర్ గడ్డ, జూబ్లీహిల్స్ రోడ్ నంబర్ 5, వెంకటగిరి జంక్షన్ చేరుకుని రోడ్ నంబర్ 10, 36 మీదుగా మాదాపూర్ వైపు సాగిపోవాలని అధికారులు వివరించారు.

నిర్మాణ పనులు పూర్తయ్యేంత వరకు వాహనదారులు పోలీసులకు సహకరించి, సూచించిన ప్రత్యామ్నాయ మార్గాల్లోనే ప్రయాణించాలని అధికారులు కోరారు.