చేతిలోని నగదు బ్యాగ్‌ లాక్కెళ్లిన కోతి.. చెట్టుపై నుంచి డబ్బుల వర్షం.. ఇదిగో వీడియో!

హిమాచల్ ప్రదేశ్ రాజధాని షిమ్లాలో ఒక విచిత్ర ఘటన చోటు చేసుకుంది. ఓ వ్యక్తి నుంచి వేలాది రూపాయల నగదును లాక్కెళ్లిన కోతి, చెట్టుపైకి ఎక్కి నోట్ల వర్షం కురిపించింది. ఈ అనూహ్య సంఘటన అక్కడి వారిని ఆశ్చర్యంలో ముంచెత్తింది.

అస‌లేం జ‌రిగిందంటే..!
షిమ్లాలోని డీసీ కార్యాలయ ప్రాంగణంలో ఈ ఘటన జరిగింది. ఓ వ్యక్తి బ్యాంకులో డిపాజిట్ చేసేందుకు రూ. 81,800 ఉన్న బ్యాగ్‌ను తీసుకెళ్తుండగా, ఓ కోతి అకస్మాత్తుగా దాడి చేసింది. రెప్పపాటులో బ్యాగ్‌లోని డబ్బు కట్టను లాక్కొని సమీపంలోని చెట్టుపైకి ఎక్కింది. సాధారణంగా కోతులు ఆహార పదార్థాలను లాక్కెళ‌తాయి, కానీ ఇలా డబ్బును ఎత్తుకెళ్లడంతో బాధితుడు నిశ్చేష్టుడయ్యాడు.

చెట్టుపైకి ఎక్కిన తర్వాత ఆ కోతి నోట్ల కట్టను విప్పి, ఒక్కొక్క నోటును కిందకు విసరడం ప్రారంభించింది. ఈ దృశ్యాన్ని చూసేందుకు జనం గుమిగూడారు. బాధితుడి నిస్సహాయతను గమనించిన డీసీ కార్యాలయ సిబ్బంది, స్థానికులు స్పందించి కింద పడిన నోట్లను సేకరించారు. కోతి తన దగ్గరున్న నోట్లన్నీ విసిరేసే వరకు ఓపికగా ఎదురుచూశారు.

చివరకు సేకరించిన డబ్బును లెక్కించగా, రూ. 1,500 తక్కువగా ఉన్నట్లు బాధితుడు గుర్తించాడు. కొన్ని రూ. 500 నోట్లను కోతి చించివేసిందని తెలిపాడు. షిమ్లాలో కోతుల బెడద కొత్తేమీ కాదని, తరచూ ప్రజల వస్తువులను లాక్కెళ్తుంటాయని స్థానికులు చెబుతున్నారు. ప్రభుత్వ కార్యాలయ ప్రాంగణంలోనే ఇలాంటి ఘటన జరగడంతో ఈ సమస్యకు పరిష్కారం చూపాలని వారు అధికారులను కోరుతున్నారు.