ఖైత‌లాపూర్ చెరువుకు హైడ్రా ఫెన్సింగ్.. సమాధి రాయికి జేసీబీ తగలడంతో ఉద్రిక్తత

మేడ్చల్-మల్కాజిగిరి జిల్లా కూకట్‌పల్లి మండలం ఖైతలాపూర్ చెరువు పరిరక్షణ పనుల సందర్భంగా పొదల్లో ఉన్న సమాధి రాయికి జేసీబీ తగిలడంతో స్థానికంగా స్వల్ప ఉద్రిక్తత చోటుచేసుకుంది. చెరువు ఎఫ్‌టీఎల్ పరిధి చుట్టూ ఫెన్సింగ్ వేసేందుకు ముళ్లపొదలను జేసీబీతో తొలగిస్తున్న సమయంలో ఈ సంఘటన జరిగింది.

ఖైతలాపూర్ చెరువు ఎఫ్‌టీఎల్ (పూర్తి స్థాయి నీటిమట్టం) పరిధిలోని 9.06 ఎకరాల విస్తీర్ణాన్ని కబ్జాల బారిన పడకుండా కాపాడేందుకు హైడ్రా గురువారం రక్షణ చర్యలు చేపట్టింది. చెరువు చుట్టూ ఫెన్సింగ్ ఏర్పాటు చేసే పనులను అధికారులు ప్రారంభించారు. ఈ క్రమంలో సరిహద్దుల్లో దట్టంగా పెరిగిన ముళ్లపొదలను జేసీబీ సాయంతో తొలగిస్తుండగా, పొదలలో కనిపించకుండా ఉన్న ఓ సమాధి రాయి యంత్రానికి తగిలి తొలగిపోయింది. సమాధిగా గుర్తించేందుకు గతంలో పాతిన ఆ రాయి తొలగిపోవడంతో స్థానికులు అభ్యంతరం వ్యక్తం చేశారు. దీంతో అక్కడ కాసేపు ఉద్రిక్త వాతావరణం నెలకొంది.

విషయం తెలుసుకున్న పోలీసులు వెంటనే ఘటనా స్థలానికి చేరుకుని బందోబస్తు ఏర్పాటు చేశారు. పరిస్థితి విషమించకుండా స్థానికులతో మాట్లాడి శాంతింపజేశారు. ఈ వ్యవహారంపై అక్కడ పనులను పర్యవేక్షించిన హైడ్రా అధికారి స్పష్టతనిచ్చారు. ముళ్లపొదలు ఎక్కువగా ఉండటం వల్లే ఆ రాయి కనిపించలేదని వివరించారు. సమాధి రాయి ఉన్న శ్మశాన స్థలాన్ని పూర్తిగా మినహాయించి, కేవలం చెరువు ఎఫ్‌టీఎల్ పరిధికి మాత్రమే రక్షణగా ఫెన్సింగ్ వేస్తున్నట్లు స్పష్టం చేశారు.

అధికారుల వివరణతో వివాదం సద్దుమణగడంతో ఫెన్సింగ్ పనులను కొనసాగించారు. చెరువు పరిధిలోని 9.06 ఎకరాల భూమిని ఆక్రమణల నుంచి రక్షిస్తూ సరిహద్దుల వెంబడి ఫెన్సింగ్ పూర్తి చేశారు. అలాగే ఇది చెరువు ఎఫ్‌టీఎల్‌కు చెందిన స్థలమని స్పష్టం చేస్తూ హైడ్రా అధికారిక బోర్డులను సైతం అక్కడ ఏర్పాటు చేసింది.