సినీ ఎంట్రీకి శ్రీదేవి పెట్టిన కండిషన్.. తల్లి గురించి సంచలన నిజం బయటపెట్టిన జాన్వీ కపూర్!

దివంగత అతిలోకసుందరి శ్రీదేవి కుమార్తె, యువ నటి జాన్వీ కపూర్ తన తల్లి గురించి కొన్ని ఆసక్తికరమైన విషయాలను పంచుకున్నారు. తాను నటిని అవుతానని చెప్పినప్పుడు శ్రీదేవి మొదట ఎలా స్పందించారో, ఆ తర్వాత ఆమె అభిప్రాయం ఎలా మారిందో తాజాగా వెల్లడించారు. తాను ముక్కుకు సర్జరీ చేయించుకున్న తర్వాతే, తనలో నటి కాగలననే నమ్మకం తన తల్లికి కలిగిందని జాన్వీ చేసిన వ్యాఖ్యలు ఇప్పుడు చర్చనీయాంశమయ్యాయి.

ఇటీవల గలాటా ప్లస్ తమిళ్‌కు ఇచ్చిన ఓ ఇంటర్వ్యూలో జాన్వీ తన కజిన్, నటి మహేశ్వరితో కలిసి పాల్గొన్నారు. ఈ సందర్భంగా ఆమె మాట్లాడుతూ.. "నేను నటిని అవుతానని అమ్మతో చెప్పినప్పుడు, ఆమె మొదట కొంచెం సంశయించారు. 'సరే, కానీ దీని కోసం నీ జీవితాన్నే అంకితం చేయాలి' అని అన్నారు" అని గుర్తుచేసుకున్నారు. దీనిపై మహేశ్వరి కూడా స్పందిస్తూ.. సినీ రంగంలో రాణించడానికి ఎంత కష్టపడాలో, ఎంత అంకితభావం అవసరమో శ్రీదేవికి తెలుసని, అందుకే ఆమె ఆందోళన చెందారని తెలిపారు.

ఈ సంభాషణలోనే జాన్వీ ఒక సున్నితమైన విషయాన్ని బయటపెట్టారు. "ఈ విషయాన్ని మీరు కట్ చేస్తారేమో, కానీ నేను ముక్కుకు సర్జరీ చేయించుకోకముందు, అమ్మ అంత నమ్మకంగా లేరు. నేను నటిని కాగలనా అని ఆమెలో సందేహం ఉండేది. కానీ, సర్జరీ తర్వాత 'పర్లేదు, నీలో పొటెన్షియల్ ఉంది' అన్నట్లుగా ఆమె అభిప్రాయం మారింది" అని జాన్వీ అంగీకరించారు.

గతంలో కూడా తన తల్లి శ్రీదేవి మార్గదర్శకత్వంలోనే తాను కొన్ని కాస్మెటిక్ సర్జరీలు చేయించుకున్నట్లు జాన్వీ తెలిపారు. అంతేకాదు, శ్రీదేవి సైతం తన కెరీర్‌లో ముక్కుకు సర్జరీ చేయించుకున్నారని, అది తమ కుటుంబంలో ఒక ముఖ్యమైన మార్పుగా నిలిచిపోయిందని జాన్వీ గతంలో పేర్కొన్నారు. 

శ్రీదేవి మరణించిన కొన్ని నెలలకే 2018లో 'ధడక్' చిత్రంతో జాన్వీ కపూర్ హీరోయిన్‌గా అరంగేట్రం చేసిన సంగతి తెలిసిందే. తన తల్లితో ఉన్న అనుబంధం, కెరీర్ తొలినాళ్లలోని విషయాలను జాన్వీ పంచుకోవడం ఇదే మొదటిసారి కాదు. అయితే, సర్జరీకి సంబంధించిన ఈ వ్యాఖ్యలు కొత్తగా వెలుగులోకి వచ్చాయి.