రాహుల్‌ వెనుక విదేశీ టూల్‌కిట్‌? బీజేపీ చీఫ్‌ నబీన్‌ సంచలన ఆరోపణలు!

లోక్‌సభలో ప్రతిపక్ష నేత రాహుల్‌ గాంధీపై బీజేపీ జాతీయ అధ్యక్షుడు నితిన్‌ నబీన్‌ తీవ్ర ఆరోపణలు చేశారు. దేశంలో అస్థిరత, అశాంతి సృష్టించేందుకు రాహుల్‌ గాంధీని విదేశీ టూల్‌కిట్‌ ఒక సాధనంగా ఉపయోగించుకుంటోందని విమర్శించారు. కాంగ్రెస్‌ నేతలే చేసిన వ్యాఖ్యలు తమ ఆరోపణలకు బలం చేకూరుస్తున్నాయని అన్నారు. ఐఏఎన్‌ఎస్‌కు ఇచ్చిన ప్రత్యేక ఇంటర్వ్యూలో ఆయన ఈ వ్యాఖ్యలు చేశారు.

కాంగ్రెస్‌ మంత్రి ఒకరు ఇటీవల రాహుల్‌ గాంధీ చేతిలోనే రిమోట్‌ బటన్‌ ఉందని, ఆయన తలచుకుంటే 40 లక్షల మందిని సమీకరించి దేశంలో అశాంతి సృష్టించగలరని వ్యాఖ్యానించిన విషయాన్ని నితిన్‌ నబీన్‌ ప్రస్తావించారు. ఈ వ్యాఖ్యలు తమ వాదనను స్పష్టం చేస్తున్నాయని అన్నారు. భారత ప్రజాస్వామ్య వ్యవస్థ మూలాలు బలంగా ఉన్నాయని, దేశంలో గందరగోళం సృష్టించాలని భావించే వారి ప్రయత్నాలు ఫలించవని పేర్కొన్నారు.

రాహుల్‌ గాంధీ పార్లమెంటరీ సంప్రదాయాలను పాటించాలని నితిన్‌ నబీన్‌ సూచించారు. ప్రతిపక్ష నేతగా సభకు వచ్చి ప్రభుత్వాన్ని ప్రశ్నించాలని, నిరసనలు చేపట్టాలనుకుంటే ప్రజాస్వామ్య పద్ధతుల్లో చేయాలని అన్నారు. బీజేపీ కూడా గతంలో వీధుల్లో ఆందోళనలు చేపట్టిందని, పార్లమెంటులోనూ ప్రజా సమస్యలపై పోరాడిందని గుర్తుచేశారు. అయితే రాహుల్‌ గాంధీ రాజకీయ అధికారం తమ కుటుంబానికే దక్కాలని భావిస్తున్నారని ఆరోపించారు.

ఎన్నికల సంఘం చేపట్టిన ప్రత్యేక సమగ్ర ఓటర్ల జాబితా సవరణ (ఎస్‌ఐఆర్‌) ప్రక్రియను కాంగ్రెస్‌ ప్రశ్నించడంపైనా ఆయన విమర్శలు చేశారు. కాంగ్రెస్‌ అధికారంలో ఉన్నప్పుడు కూడా ఓటర్ల జాబితా సవరణ జరిగిందని, అప్పుడు అభ్యంతరాలు వ్యక్తం చేయలేదని అన్నారు. ఉనికిలో లేని ఓటర్ల పేర్లను తొలగించడాన్ని రాహుల్‌ గాంధీ ఎందుకు వ్యతిరేకిస్తున్నారని ప్రశ్నించారు. రాజ్యాంగ సంస్థలను వివాదాల్లోకి లాగేందుకు ప్రతిపక్షం ప్రయత్నిస్తోందని ఆరోపించారు.

ప్రధాని మోదీతో చర్చకు రావాలన్న రాహుల్‌ గాంధీ సవాలుపైనా నితిన్‌ నబీన్‌ స్పందించారు. చర్చించాలనుకుంటే పార్లమెంటులోనే ప్రశ్నలు లేవనెత్తాలని సూచించారు. రాహుల్‌ ప్రాతినిధ్యం వహించిన నియోజకవర్గాల్లో చేసిన అభివృద్ధి పనులేంటో చెప్పాలని ప్రశ్నించారు. ఆయనకు ప్రతిపక్ష నేత హోదా పార్టీకి వచ్చిన సీట్ల వల్లే దక్కిందని వ్యాఖ్యానించారు. బీజేపీ నేతలు మాత్రమే కాకుండా ఆ పార్టీ కార్యకర్తలు కూడా రాహుల్‌ ఆరోపణలకు సమాధానం చెప్పగలరని అన్నారు.