కౌంటింగ్ వేళ.. వైసీపీ నేత బైరెడ్డి సిద్ధార్థ్ రెడ్డి హౌస్ అరెస్ట్

ఆంధ్రప్రదేశ్‌లో ఎంపీటీసీ, జడ్పీటీసీ ఎన్నికల ఓట్ల లెక్కింపు ప్రక్రియ ప్రశాంతంగా కొనసాగుతోంది. అవాంఛనీయ ఘటనలు జరగకుండా పోలీసులు రాష్ట్రవ్యాప్తంగా కట్టుదిట్టమైన భద్రతా ఏర్పాట్లు చేశారు. ఈ క్రమంలో ముందుజాగ్రత్త చర్యగా కర్నూలు జిల్లాకు చెందిన వైసీపీ నేత బైరెడ్డి సిద్ధార్థ్ రెడ్డిని పోలీసులు గృహ నిర్బంధం చేశారు.

నందికొట్కూరులోని ఎన్నికల కౌంటింగ్ కేంద్రానికి వెళ్లేందుకు సిద్ధార్థ్ రెడ్డి తన ఇంటి నుంచి బయలుదేరారు. ఈ సమాచారం అందుకున్న పోలీసులు భారీగా ఆయన ఇంటి వద్దకు చేరుకున్నారు. ఆయన బయటకు రాగానే అడ్డుకుని, హౌస్ అరెస్ట్ చేస్తున్నట్లు తెలిపారు. దీంతో ఆయన ఇంటి వద్ద స్వల్ప ఉద్రిక్త వాతావరణం నెలకొంది.

పరిషత్ ఎన్నికల పోలింగ్ జరిగిన రోజున కూడా శాంతిభద్రతల దృష్ట్యా పోలీసులు బైరెడ్డి సిద్ధార్థ్ రెడ్డిని గృహ నిర్బంధం చేసిన విషయం తెలిసిందే. ఇప్పుడు కౌంటింగ్ సందర్భంగా కూడా ఎలాంటి ఘర్షణలకు ఆస్కారం ఉండకూడదనే ఉద్దేశంతో పోలీసులు ఈ చర్యలు తీసుకున్నారు. సమస్యాత్మక ప్రాంతాల్లో ప్రజాప్రతినిధులు, కీలక నేతలను కౌంటింగ్ కేంద్రాల వద్దకు రాకుండా కట్టడి చేస్తున్నారు. రాష్ట్రవ్యాప్తంగా అక్కడక్కడా స్వల్ప ఉద్రిక్తతలు మినహా ఓట్ల లెక్కింపు ప్రక్రియ ప్రశాంతంగానే సాగుతోంది.