భారతదేశంలోనే ‘మినీ ఇజ్రాయెల్‌’.. హిమాలయాల్లో దాగున్న ఈ గ్రామం ప్రత్యేకతలు తెలిస్తే ఆశ్చర్యపోతారు!

చుట్టూ మంచు కొండలు.. పచ్చని ప్రకృతి.. ప్రశాంతమైన వాతావరణం.. వీటికి తోడు ఎక్కడ చూసినా హిబ్రూ భాషలో బోర్డులు, ఇజ్రాయెల్‌ వంటకాలతో రెస్టారెంట్లు కనిపిస్తే ఎలా ఉంటుంది? మన దేశంలోనే అలాంటి ఓ ప్రత్యేక గ్రామం ఉంది. అదే హిమాచల్‌ప్రదేశ్‌లోని ధర్మకోట్‌. హిమాలయ పర్వతశ్రేణుల మధ్య కొలువుదీరిన ఈ చిన్న గ్రామాన్ని ‘మినీ ఇజ్రాయెల్‌’గా పిలుస్తారు. ఇజ్రాయెల్‌ పర్యాటకులకు ఇది రెండో ఇల్లులా మారింది. అందుకే దేశవిదేశాల పర్యాటకులను ఈ గ్రామం ఆకర్షిస్తోంది.

ఇజ్రాయెల్‌ పర్యాటకులకు ప్రత్యేక విడిది
హిమాచల్‌ప్రదేశ్‌లోని కాంగ్రా జిల్లాలో ధర్మకోట్‌ గ్రామం ఉంది. మెక్‌లియోడ్‌గంజ్‌కు సమీపంలో ధౌలాధర్‌ పర్వతశ్రేణుల ఒడిలో ఇది ఉంటుంది. కొన్నేళ్లుగా ఇజ్రాయెల్‌ యువత ఇక్కడికి పెద్ద సంఖ్యలో వస్తున్నారు. ముఖ్యంగా సైనిక శిక్షణ పూర్తిచేసుకున్న యువత ప్రశాంతమైన వాతావరణం కోసం ఈ ప్రాంతాన్ని ఎంచుకుంటున్నారు. ప్రకృతి అందాలు, తక్కువ ఖర్చుతో బస చేసే సదుపాయాలు వారిని ఆకర్షిస్తున్నాయి.

హిబ్రూ బోర్డులు.. ఇజ్రాయెల్‌ వంటకాలు
ఇక్కడి వీధుల్లో నడుస్తుంటే ఇజ్రాయెల్‌లో ఉన్నామా అన్న భావన కలుగుతుంది. దుకాణాల పేర్లు, సూచిక బోర్డుల్లో హిబ్రూ భాష కనిపిస్తుంది. రెస్టారెంట్లలో ఫలాఫెల్‌, హమ్మస్‌, పిటా, షక్షూకా వంటి ఇజ్రాయెల్‌ వంటకాలు లభిస్తాయి. స్థానికులు కూడా కొందరు హిబ్రూ భాష మాట్లాడగలరు. పర్యాటకుల కోసం గెస్ట్‌హౌస్‌లు, హోమ్‌స్టేలు, కేఫ్‌లు ఏర్పాటయ్యాయి. ఇక్కడ యోగా, ధ్యానం, సంగీతం, నగల తయారీ వంటి శిక్షణ కార్యక్రమాలూ నిర్వహిస్తుంటారు.

ధ్యానం.. ట్రెక్కింగ్‌కు కేరాఫ్‌
ధర్మకోట్‌ కేవలం ఇజ్రాయెల్‌ పర్యాటకులకే కాదు.. ప్రకృతిని ప్రేమించేవారికి కూడా ప్రత్యేక ఆకర్షణ. ఇక్కడి నుంచి త్రియుండ్‌ ట్రెక్కింగ్‌, లాకా హిమానీనదం వంటి ప్రాంతాలకు వెళ్లొచ్చు. ధ్యానం నేర్చుకోవాలనుకునేవారికి తుషిత మెడిటేషన్‌ సెంటర్‌ మరో ప్రత్యేక ఆకర్షణ. ప్రశాంతమైన జీవనశైలి, పర్వత సౌందర్యం ఈ గ్రామానికి ప్రత్యేక గుర్తింపు తెచ్చాయి.

ఎలా చేరుకోవాలంటే?
ధర్మశాల నుంచి సుమారు 9-10 కిలోమీటర్ల దూరంలో ఈ గ్రామం ఉంది. మెక్‌లియోడ్‌గంజ్‌ నుంచి కేవలం 1-2 కిలోమీటర్ల దూరంలో ఉంటుంది. సమీప విమానాశ్రయం కాంగ్రాలోని గగ్గల్‌ ఎయిర్‌పోర్ట్‌. ప్రకృతి అందాలతో పాటు భిన్నమైన సంస్కృతిని ఆస్వాదించాలనుకునేవారికి ధర్మకోట్‌ మంచి పర్యాటక ప్రాంతం.