చరిత్ర సృష్టించిన కేరళ మహిళ.. లాస్ ఏంజెలెస్ మేయర్‌గా నిత్యా రామన్!

అమెరికా రాజకీయాల్లో భారత సంతతికి చెందిన వారు మరోసారి తమ సత్తా చాటారు. ప్రపంచ ప్రఖ్యాత నగరం లాస్ ఏంజెలెస్ మేయర్ ఎన్నికల్లో భారత సంతతికి చెందిన నిత్యా రామన్ చారిత్రక విజయం సాధించారు. సిట్టింగ్ మేయర్ కరెన్ బాస్‌పై ఆమె గెలుపొందనున్నారని ఎన్నికల ఫలితాల సరళిని విశ్లేషించిన 'డిసిషన్ డెస్క్ హెచ్‌క్యూ' తన కథనంలో పేర్కొంది. ఈ విజయంతో ఆమె లాస్ ఏంజెలెస్ నగరానికి తొలి ఆసియన్-అమెరికన్ మేయర్‌గా, రెండో మహిళా మేయర్‌గా చరిత్ర పుటల్లో నిలిచిపోనున్నారు.

ప్రస్తుతం వెలువడుతున్న ఫలితాల ప్రకారం నిత్యా రామన్ దాదాపు 51 శాతం ఓట్లతో ముందంజలో ఉన్నారు. ఆమె ప్రత్యర్థి కరెన్ బాస్‌కు 48 శాతం ఓట్లు పోలయ్యాయి. ఇప్పటికే గణనీయమైన సంఖ్యలో బ్యాలెట్లను లెక్కించడంతో నిత్యా రామన్ విజయం దాదాపు ఖాయమని తెలుస్తోంది. 

భారత్‌లోని కేరళలో జన్మించిన నిత్యా రామన్, చిన్నతనంలోనే తన కుటుంబంతో కలిసి అమెరికాకు వలస వెళ్లారు. హార్వర్డ్, ఎంఐటీ వంటి ప్రఖ్యాత విశ్వవిద్యాలయాల్లో అర్బన్ ప్లానర్‌గా ఉన్నత విద్యను అభ్యసించారు. ప్రస్తుతం ఆమె లాస్ ఏంజెలెస్ సిటీ కౌన్సిల్ సభ్యురాలిగా పనిచేస్తున్నారు. ఆసక్తికరంగా మొదట్లో కరెన్ బాస్‌కు మద్దతు ప్రకటించిన నిత్యా, ఆ తర్వాత అనూహ్యంగా రేసులోకి ప్రవేశించి అందరినీ ఆశ్చర్యపరిచారు.

నగరంలో గృహవసతి కొరత, నిరాశ్రయుల సమస్య, మౌలిక సదుపాయాల మెరుగుదల వంటి కీలక అంశాలపై దృష్టి సారించి నిత్యా ప్రచారం నిర్వహించారు. ముఖ్యంగా యువ ఓటర్ల నుంచి ఆమెకు బలమైన మద్దతు లభించింది. మరోవైపు, సిట్టింగ్ మేయర్ కరెన్ బాస్ తన పదవీకాలంలో కార్చిచ్చులు, పెరుగుతున్న నిరాశ్రయుల సమస్య, ఎంటర్‌టైన్‌మెంట్ పరిశ్రమలో ఆర్థిక ఒత్తిళ్లు వంటి సవాళ్లను ఎదుర్కొన్నారు. ఈ అంశాలు ఆమె ఓటమికి కారణమై ఉండవచ్చని విశ్లేషకులు భావిస్తున్నారు. ఈ ఎన్నికలు 2026 అమెరికా మధ్యంతర ఎన్నికల్లో భాగంగా జరిగాయి.